Մի քիչ կույս, մի քիչ հղի, ինչու Արմեն Գեւորգյանին չկալանավորեցին

Երևանի ընդհանուր իրավասության դատարանը չբավարարեց նախկին փոխվարչապետ Արմեն Գևորգյանի կալանքի միջնորդությունը: «Դատարանը կալանավորման միջնորդությունը մերժեց: Ես կարծում եմ, որ,այս պահի դրությամբ, կայացվել է արդար որոշում՝ այնքանով, որքանով հաշվի են առնվել դատական նիստերի ժամանակ մեր փաստարկները: Բայց սա չի նշանակում, որ մենք այլևս անելիք չունենք, մենք շարունակելու ենք ապացուցել իմ անմեղությունը»,-նիստից հետո հայտարարել է Գեւորգյանը: Նա ավելի վաղ լրագրողների հետ զրույցում նշել էր, որ լավատեսությամբ է վերաբերում իր նկատմամբ տեղի ունեցող գործընթացներին, և թեև մեղադրանքները ծանր են, բայց կարևորն այն է, որ ինքը դրանք չի ընդունում: 2018ի օգոստոսին Արմեն Գևորգյանին մեղադրանք է առաջադրվել արդարադատության իրականացմանը խոչընդոտելու համար՝ ՀՀ Քրեական օրենսգրքի 332-րդ հոդվածի 3-րդ մասով, որը միացվել է 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործին: Արմեն Գևորգյանի նկատմամբ որպես խափանման միջոց էր ընտրվել ստորագրություն չհեռանալու մասին։ Նրա մեղադրանքն այժմ լրացվել է։ Նրան մեղադրանք է առաջադրվել ՀՀ ՔՕ-ի 38-300.1 հոդվածի՝ սահմանադրական կարգի տապալմանն օժանդակելը, 311-րդ հոդվածի 4-րդ մասի 2-րդ կետի՝ առանձնապես խոշոր չափերով կաշառք վերցնելը, ինչպես նաև ՔՕ-ի 190-րդհոդվածի3-րդ մասի 1-ին կետի հատկանիշներով՝ հանցավոր ճանապարհով ստացված գույքն օրինականացնելը՝ առանձնապես խոշոր չափերով։ Արմեն Գեւորգյանը համարվում է երկրորդ նախագահ Ռոբերտ Քոչարյանի ամենամտերիմ անձանցից մեկը եւ մի կողմից զարմանալի ու անակնկալ էր նրա նկատմամբ կայացրած վճիռը՝ հաշվի առնելով, որ Նիկոլ Փաշինյանը անձնական վրեժխնդրությունն է լուծում երկրորդ նախագահի նկատամբ եւ իրավաբանական խարխուլ հիմնավորմամբ Քոչարյանին պահում է անազատության մեջ, ավելին կալանքի տակ է պահում նաեւ երկրորդ նախագահի շրջապատի առանցքային դեմքերից Սամվել Մայրապետյանին ու թվում էր, թե հաջորդը լինելու է Արմեն Գեւորգյանը, բայց ոչ: Ինչու հանկարծ Նիկոլ Փաշինյանի կողմից ակնհայտորեն ուղղորդվող դատարանը նման որոշում կայացրեց, կարծում ենք մեծ խելք պետք չէ դա հասկանալու համար: Բանն այն է, որ Ռուսաստանը սեղմել է օղակը Հայաստանի վզին եւ Նիկոլ Փաշինյանին այլ ելք չի մնում, քան դուրս գալ այդ վիճակից: Ինչպես հայտնի է մինչեւ երեկ պաշտոնական Մոսկվան քար լռություն էր պահպանում դեկտեմբերի 9-ին Հայաստանում տեղի ունեցած ընտրությունների վերաբերյալ: Մոսկվան առիթի էր սպասում, որպեսզի ցույց տա իր իրական վերաբերմունքը Փաշինյանի կողմից Ռոբերտ Քոչարյանի կալանավորման, ՀԱՊԿ-ին հասցված հարվածի, ՌԴ ԱԳ նախարար Լավրովին՝ ներհայաստանյան քաղաքական գործընթացներին ադապտացվելու կոչի և այլնի համար: Հարկ է շեշտել, որ Վլադիմիր Պուտինը անձամբ չի թաքցրել իր անձնական վերաբերմունքը Քոչարյանի նկատմամբ, ինչի վկայությունն էր այս տարի Հայաստանի երկրորդ նախագահին Պուտինի կողմից ուղղված ծննդյան շնորհավորանքը: Հիմա Ռուսաստանը, ըստ էության, բացահայտ ցուցադրում է իր վերաբերմունքը, որը ծաղրից վերեւ չի բարձրանում: Այդ մասին է վկայում Ռուսաստանի ԱԳ նախարարի խոսնակ Մարիա Զախարովայի՝ ընտրությունների վերաբերյալ հայտնի արձագանքը: Հիշեցնենք, որ Զախարովան, անդրադառնալով ընտրություններին, նշել էր, որ տրամադրված են կառուցողական երկխոսություն վարել Հայաստանի նոր խորհրդարանի ու ձևավորվելիք կառավարության հետ՝ նպատակ ունենալով ավելի ամրապնդել մեր երկրների միջև փոխգործակցությունը, այդ թվում՝ ԵԱՏՄ, ՀԱՊԿ և ԱՊՀ շրջանակներում: Թե ինչու ՌԴ-ի բարձագույն ղեկավարությունը չի շնորհավորել Նիկոլ Փաշինյանին հարցին, նա պատասխանել ․«Ինձ թվում է՝ դա նույնն է, եթե տղամարդուն հարցնես՝ «դու ինձ սիրու՞մ ես»: Հիշեցնենք, որ 2017 թվականի ապրիլի 2-ին կայացած խորհրդարանական ընտրություններին ՌԴ նախագահ Պուտինը ընտրությունների հաջորդ օրը՝ ապրիլի 3-ին, շնորհավորել էր Սերժ Սարգսյանին՝ իր գլխավորած Հանրապետական կուսակցության հաղթանակի առիթով:Բացի Պուտինից՝ Նիկոլ Փաշինյանին դեռ չեն շնորհավորել նաև Բելառուսի, Ղազախստանի, Ղրղըզստանի ղեկավարները: Այս իրողությունից թերեւս նեղված Փաշինյանը որոշել է մի քիչ սիրաշահել Ռռուսաստանին եւ կալանքի սանկցիա չտալ Արմեն Գեւորգյանին: ՀՀ ղեկավարությանը թվում է, որ մի քիչ հղի, մի քիչ կույս վիճակներով կարող են պետություն ղեկավարել ու կառուցել հարեւանների հետ հարաբերությունները: Անի Սահակյան