Նիկոլ Փաշինյանը հող նախապատրաստեց կեղծելու ընտրությունները

Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, մերժեց Ռոբերտ Քոչարյանի պաշտպանների բողոքը. Ռոբերտ Քոչարյանն արդեն կկալանավորված է: Հիշեցնենք, որ դատարանը մի քանի օր քննում էր պաշտպանների բողոքը:Վճռաբեկ դատարանը նոյեմբերի 15-ին բեկանել է Ռոբերտ Քոչարյանի նկատմամբ ընտրված խափանման միջոց կալանավորումն անձեռնմխելիության հիմքով վերացնելու վերաբերյալ Վերաքննիչ դատարանի որոշումը, եւ գործն ուղարկվել է նույն դատարան՝ նոր քննության: ՀՀ երկրորդ նախագահին կալանավորելու որոշումը կարծում ենք՝ կայացվել մի շարք պատճառներով: Այսպիսով՝ պատճառ առաջին, իր իշխանության յոթ ամիսների ընթացքում Նիկոլ Փաշինյանը բացի մի քանի մանր-մունր բռնոցի բաց թողնոցիից ոչ մի քրեական գործ մինչեւ վերջ չի ավարտել, չենք խոսում ընդհանրապես ձախողված թե ներքին, թե արտաքին քաղաքականության, տասնյակ ոլորտներում ցուցանիշների անկման եւ հետնահանջի մասին: Հետեւաբար պետք էր մանր-մունր տեսարաններից հետո եւ արտահերթ ընտրություններից երկու օր առաջ խոշոր <<գլուխ>> բռնել,որպեսզի լյումպեն մասաներին կողմնորոշի դեպի իր ղեկավարած ուժը՝ ցույց տալով, որ ինքը կարող է անգամ Քոչարյանի պես նախկին նախագահ ձերբակալել, ինչն էլ եղավ հենց այսօր: Նոյեմբերի 26-ին, երբ Նիկոլ Փաշինյանը որոշեց համաերեւանյան քայլերթ անցկացնել, այն ավարտվեց խայտառակությամբ ու պարզ դարձավ, որ էյֆորիան տեղի է տվել, Փաշինյանի հետ քայլել պատրաստ են 100-200 մարդ՝ ներառյալ թիմակիցները, ինչը եւս մեկ ապացույց էր այն բանի, որ դուխով վարչապետը քվե ստանալու լրջագույն խնդրի առջեւ է կանգնած: Չենք խոսում, որ նախընտրական քարոզարշավը եւ հեռուստատեսային բանավեճերի ֆորմատը մերկացրեց Փաշինյանին ու իր թիմը՝ ցույց տալով, թե որքան անտեղյակ են պետության կառավարման թե ներքին, թե արտաքին խնդիրներին: Ավելին, ատաքին տիրույթում նաեւ շեշտակի հարվածներ ստացանք, կորուստներ ունեցանք՝ ի դեմս ՀԱՊԿ-ում նախագահության մեր տեղը զիջելով գործընկեր պետությանը, ինչը, կրկին, իշխանությունների անհեռատես գործողությունների արդյունք էր: Մի խոսքով՝ պաշտոնավարման մի քանի ամիսը բավարար էր ցուցադրելու, որպեսզի Նիկոլ Փաշինյանն ու իր թիմը մսխեին ժողովրդից ստացած վստահությունը եւ չկարողանային այն փաստացի ամրագրել: Եւ այս պայմաններում այլ բան չի մնում քան տոկոս խփել այնքան, որքան հարկավոր է, ինչն էլ Փաշինյանը կլեգիտիմացնի Քոչարյանի կալանավորմամբ՝ միջազգային հանրությանը վստահեցնելով, որ այդ ձերբակալության արդյունքն էր, որ իրենք այդքան բարձր տոկոս ունեցան: Այլ կերպ ասած՝ Փաշինյանը լեգիտիմացրեց ընտրության կեղծումը: Անի Սահակյան