Ինտրիգ, որը գնալով խորանում է
Որքան մոտենում է Հրազդանի քաղաքապետի ընտրությունների օրը՝ ապրիլի 17-ը, այնքան թեժանում են կրքերը՝ ինչպես իշխանության, այնպես էլ ընդդդիմության դաշտում։ Բանը հասել է նրան, որ ընդդիմության թեկնածու Սասուն Միքայելյանն է արդեն ներքաշվել նախընտրական թոհուբոհի մեջ, մինչդեռ օրեր առաջ նա հրաժարվում էր նմանատիպ հարցերից ու ցույց տալիս իր նախընտրական շտաբի ղեկավար, ԱԺ ՀԱԿ խմբակցության պատգամավոր Նիկոլ Փաշինյանի կողմը։ Այսպիսով՝ իսկզբանե Հրազդանի ընտրությունների նկատմամբ անսպասելի դիրքորոշում ձեւավորվեց, շատերն անակնկալի եկան այն բանից, որ ՀԱԿ-ը հրաժարվեց հանձնաժողովի իր տեղերը տրամադրել Միքայելյանի տնօրինությանը՝ ինչ-ինչ անհեթեթ պատճառաբանություններ ներկայացնելով եւ գլխավորապես այն մեկը, որ ՀԱԿ-ի ներկայացուցիչներն իրենք կպայքարեն ազատ, արդար ընտրությունների կայացման համար։ Իհարկե, հակառակ կողմից կասկած չէր հնչել այդ առիթով, ընդամենը Քաղաքացիական պայմանագիր կուսակցության անդամները, որոնցից շատերն իրենց լուման են ունեցել ՀԱԿ-ի ձեւավորման հարցում, նման ցանկություն էին հայտնել, սակայն խորը կասկածենր առաջացան, երբ նախկին դաշնակիցները մերժեցին Սասուն Միքայելյանին, ով հայտնի է, թե ինչ զրկանքների ենթարկվեց Լեւոն Տեր-Պետրոսյանին վստահելու եւ 2008-ին նրա կողքին հայտնվելու պատճառով։ ՔՊ ներկայացուցիչները ՀԱԿ-ին մեղադրեցին իշխանության ջրաղացին ջուր լցնելու եւ իշխանությանն աջակցելու հարցում։ Այս հեռահար «բազառների» ու բանավեճի ընթացքում Սասուն Միքայելյանը «դիտորդի» կարգավիճակ էր ստանձնել մինչեւ այն պահը, երբ ՀԱԿ-ից հայտարարություններ հնչեցին, թե իբր հանիրավի են իշխանությանն աջակցելու իրենց հասցեագրված մեղադրանքները, մասնավորապես Հրազդանի կառույցի ՀԱԿ ներկայացուցիչ Արամ Բարեղամյանը հայտարարեց, թե այն, որ ՀԱԿ-ը թեկնածու չի առաջադրել, արդեն իսկ շատ բան է նշանակում։ ՀԱԿ անդամը, ըստ ամենայնի, ցանկացել էր ասել, թե կարող էին իրենք էլ թեկնածու առաջադրել, բայց չեն արել, քանի որ Սասուն Միքայելյանն է առաջադրվել։ «Հետաքրքիր է՝ ում պիտի առաջադրեին», բազմանշանակ ճշտումով է հանդես եկել անձամբ Սասուն Միքայելյանը՝ ակնարկելով թերեւս, որ ՀԱԿ-ը այդ տարածքում փոշիացել է եւ անկեղծ զարմացել ՀԱԿ մտադրության առիթով։ Դրան զուգահեռ լուրեր են տարածվել, թե իբր Հովիկ Աբրահամյանի կարգադրությամբ Կոտայքի մարզպետ, Գագիկ Ծառուկյանի փեսա Մուրադ Գուլոյանը աջակցելու է Սասուն Միքայելյանին։ Այսպիսով՝ ակնհայտ է, որ կենացները գնալով քաղցրանում են եւ Սասուն Միքայելյանն արդեն անձամբ է ներքաշվել իր դեմ ընթացող պայքարին։ Խնդիրն այն է, որ Հրազդանում Սասուն Միքայելյանի հաղթանակը ձեռնտու չէ նախեւառաջ ընդդիմադիր շրջանակներին։ Հաղթանակը կարող է շոշափելի փոփոխությունների ենթարկել ընդդիմադիր դաշտի քարտեզը։ Մի կողմից, դա կտրուկ կբարձրացնի Քաղաքացիական պայմանագրի քաղաքական կշիռը, մյուս կողմից՝ կգուժի հնամենի ուժերի վախճանը եւ հատկապես ՀԱԿ-ի, որի հիմնական մրցակիցն է համարվում Փաշինյանի հիմնադրած կուսակցությունը։ Պատահական չէ, որ Փաշինյանը երեկ Ազատության հետ զրույցում հայտարարել է, թե Հայաստանում պետք է լինի մեկ ընդդիմություն եւ դա լինելու է «Քաղաքացիական պայմանագիրը»։ Սակայն այս ամենը հնարավոր է միայն այն պարագայում, երբ իշխանությունները չգնան հին ու փորձված մեթոդներին։ Հատկապես, որ իշխանությունների համար Հրազդանը բախտորոշ հանգրվան չէ, հակառակը, զիջման գնալու դեպքում իշխանության նկատմամբ կարող է վստահության նշույլ առաջանա մեծ ընտրություններին ընդառաջ։ Հենց սրանում է Հրազդանի ընտրությունների ինտրիգը։ Անի Սահակյան
Հետևեք մեզ Viber-ում
