Նեմցովի դուստրն արժանացել է «Աշխարհի ամենախիզախ կանայք – 2016» մրցանակի
ԱՄՆ-ում տեղի կունենա «Աշխարհի ամենախիզախ կանայք – 2016» մրցանակաբաշխությունը: Այս տարի դափնեկիրներից մեկը Ռուսաստանի քաղաքացի, լրագրող Ժաննա Նեմցովան է` 2015-ին սպանված քաղաքական գործիչ Բորիս Նեմցովի դուստրը, հայտնում է ամերիկյան Պետքարտուղարության կայքը: Պարգեւատրման արարողությունը տեղի կունենա Վաշինգթոնում` տեղի ժամանակով 10:30-ին: Միջոցառումը ուղիղ եթերում կհեռարձակվի Պետքարտուղարության կայքում, հայտնում է NEWSru-ն: Նեմցովայից բացի, մրցանակին ներկայացված էին ակտիվիստուհիներ Բանգլադեշից, Բելիզայից, Գվատեմալայից, Իրաքից, Եմենից, Չինաստանից, Մալայզիայից, Սլովակիայից, Սուդանից, Տանզանիայից, Թայլանդից եւ Ֆրանսիայից: Դափնեկիրներին մրցանակներ կհանձնի ԱՄՆ-ի պետքարտուղար Ջոն Քերրին: Պետքարտուղարության հաղորդագրության մեջ ասված է, որ մրցանակը «ամեն տարի շնորհվում է այնպիսի կանանց, որոնք քաջություն եւ խաղաղության, արդարության, մարդու իրավունքների, գենդերային հավասարության, ինչպես նաեւ կանանց հնարավորությունների պաշտպանության գործում առաջնորդություն են դրսեւորել` հաճախ սեփական անվտանգությունը վտանգելու գնով»: Առաջին անգամ այս մրցանակը հանձնվել է 2007-ին: Այդ ժամանակվանից մրցանակակիր է դարձել մոտ 60 երկրի 100 ներկայացուցիչ: Պետքարտուղարության կայքում համառոտ տեղեկություններ են հրապարակված ներկայիս մրցանակակիրների վերաբերյալ: Ժաննա Նեմցովայի մասին ասված է, որ նա «չեմպիոն է Ռուսաստանում ժողովրդավարության, կրթության եւ տեղեկատվության ազատության ոլորտում»: «Իր հոր` Նեմցովի սպանությունից հետո, չնայած իր հասցեին հնչած մեղադրանքներին, նա Մոսկվայում է մնացել եւ տվյալ հանցագործության մանրակրկիտ հետաքննություն է պահանջել: Սակայն Ռուսաստանի նախագահ Վլադիմիր Պուտինի հասցեին մեղադրանքներից հետո, որով նա վերջինիս վրա էր դնում սպանության «քաղաքական պատասխանատվությունը», Ժաննա Նեմցովան ստիպված էր հեռանալ երկրից եւ մեկնել Գերմանիա, որտեղ շարունակում է պայքարել Ռուսաստանում մարդու իրավունքների համար` աշխատելով որպես Deutsche Welle-ի թղթակից»,-հայտնում է Պետքարտուղարությունը: Գերատեսչությունում նաեւ հիշեցնում են, որ անցյալ ամիս Ժաննան հիմնադրել է «Բորիս Նեմցովի հանուն ազատության հիմնադրամը»` ռուսաստանյան տնտեսության եւ քաղաքականության մեջ հետազոտությունների ֆինանսավորման նպատակով: Ռուսաստանում ԱՄՆ-ի դեսպանատան անունից Ջոն Տեֆտը Ռուսաստանի պարգեւատրված քաղաքացուն է դիմել եւ նրան իր շնորհավորանքներն է փոխանցել: «Ժաննան այս պարգեւը ստացել է իր գործընկերուհուց` Ելենա Միլաշինայից հետո, որը 2013-ին մրցանակակիր էր դարձել, եւ ռուսաստանցի այլ ականավոր կանանց շարքում, որոնց ջանքերը գնահատվել են այս մրցանակով», - հայտնել է դեսպանը` նշելով, որ Ժաննան այս մրցանակին է արժանացել «խիզախության եւ իր հոր` Բորիս Նեմցովի սպանության մանրակրկիտ եւ թափանցիկ հետաքննության հասնելու, քարոզչության վտանգավոր եւ անպատասխանատու օգտագործման բացահայտմանն իր համառ նվիրվածության համար»:
Հետևեք մեզ Viber-ում
