Միմյանց չուղղված հայացքներ. Պուտինը՝ նոր պրեսինգի տակ

Աշխարհի ուշադրության կենտրոնում այս օրերին Թրամփ-Պուտին չկայացած շփումն էր: Ռուսաստանի նախագահ Վլադիմիր Պուտինը և նրա ամերիկացի գործընկեր Դոնալդ Թրամփը Բուենոս Այրեսում կայացած G-20 գագաթնաժողովի ընթացքում չողջունեցին միմյանց: Պուտինը Թրամփից առաջ է բարձրացել հարթակ լուսանկարվելու համար, իսկ վերջինս իր տեղն է գնացել՝ առանց ուշադրություն դարձնելու Պուտինի վրա։ Դրանից հետո երկրների ղեկավարները գնացել են դահլիճ, որտեղ անց է կացվել առաջին նիստը։ Սպիտակ տան ղեկավարը առաջին նիստին փոքր-ինչ ուշացումով է ներկայացել։ Լիագումար նիստի դահլիճում Պուտինը ողջունել է Սաուդյան Արաբիայի թագաժառանգ Մուհամմադ Բեն Զալման ալ-Սաուդին, իսկ Թրամփն այդ ժամանակ շփվել է միջոցառման մյուս մասնակիցների հետ: Նիստերի ժամանակ Պուտինը և Թրամփը միմյանցից հեռու են նստելու. նրանց միջև նստած են եղել Սաուդյան Արաբիայի թագաժառանգը, Հարավային Աֆրիկայի Հանրապետության նախագահ Սիրիլ Ռամաֆոսեն, Թուրքիայի ղեկավար Ռեջեփ Թայիփ Էրդողանը և Մեծ Բրիտանիայի վարչապետ Թերեզա Մեյը: Եվս մեկ կորսված հնարավորություն, կրկին Ռուսաստան-ԱՄՆ հարաբերությունների լարման ցուցադրություն: Երեկ արդեն հայտնի դարձավ, որ Վաշինգտոնը մտադիր է պատժամիջոցների երկրորդ փաթեթը սահմանել Մոսկվայի դեմ՝ Մեծ Բրիտանիայում ռուս նախկին լրտես Սերգեյ Սկրիպալին և նրա դստերը նյարդապարալիտիկ նյութով թունավորելու համար: ԱՄՆ պետդեպարտամենտը հայտնում է, որ Ռուսաստանի դեմ այս պատժամիջոցները սահմանվում են Քիմիական և կենսաբանական զենքի արգելման մասին օրենքի շրջանակներում. «Մենք մտադիր ենք կատարել ամերիկյան օրենսդրության պահանջները»։ Սկրիպալների գործով պատժամիջոցների առաջին փաթեթն ուժի մեջ է մտել օգոստոսի 27-ին։ Ենթադրվում էր, որ երկրորդ փաթեթն էլ ուժի մեջ կմտնի 90 օրվա ընթացքում, եթե Ռուսաստանը չկատարի մի շարք պայմաններ։ Վաշինգտոնը հայտնում է, որ Ռուսաստանն այդ պայմանները չի կատարել։ Պատժամիջոցների երկրորդ փաթեթը, փորձագետների գնահատմամբ, չափազանց կոշտ է և լուրջ խնդիրներ է առաջացնելու Ռուսաստանի տնտեսության համար։ Այս փաթեթով մասնավորապես նախատեսվում է արգելել ռուսական ապրանքների մուտքը Միացյալ Նահանգներ, այդ թվում՝ նաև նավթի ու նավթամթերքի։ Արգելվում է նաև ամերիկյան ապրանքների մուտքը Ռուսաստան, բացի մթերքից։ Արգելվում է նաև Ռուսաստանի պետական ավիաընկերությունների թռիչքները Միացյալ Նահանգներ, այդ թվում՝ «Աերոֆլոտ» ավիաընկերության օդանավերի թռիչքները դեպի ամերիկյան օդանավակայաններ։ Ավելի վաղ հայտարարվել էր, որ մինչև տարվա վերջ Միացյալ Նահանգները հնարավոր է չհասցնի սահմանել այս պատժամիջոցների երկրորդ փաթեթը, քանի որ Կոնգրեսը չի հասցնի հաստատել։ Սկրիպալներին անգիտակից վիճակում հայտնաբերել էին մարտի 4-ին Սոլսբերիում՝ նստարանի վրա: Շաբաթներ շարունակ հիվանդանոցում բուժում ստանալուց հետո նրանք ապաքինվել են: Բրիտանական իշխանությունները պարզել են, որ Սկրիպալները թունավորվել են ԽՍՀՄ-ում արտադրված «Նովիչոկ» տեսակի նյարդապարալիտիկ նյութով: Ռուսաստանը հերքում է մեղադրանքները: Մետաքսյա Շալունց