Մոսկվան վերջապես «արթնացա՞վ»

Լարված սահմաններ Վերջին մի քանի օրերին կրկին բավական լարված է սահմաններում: Պաշտպանության բանակի օպերատիվ տվյալների համաձայն, մարտի 20-ից 26-ն ընկած ժամանակահատվածում ղարաբաղա-ադրբեջանական հակամարտ զորքերի շփման գծում հակառակորդի կողմից, տարբեր տրամաչափի հրաձգային զինատեսակներից, 60 և 82 միլիմետրանոց ականանետերից, ՀԱՆ-17 ու ՌՊԳ-7 տիպի նռնականետերից, հայ դիրքապահների ուղղությամբ արձակվել է ավելի քան 13 000 կրակոց: Հակառակորդի կողմից TR-107 տիպի հրթիռահրետանային կայանքների արկակոծման հետևանքով վիրավորում է ստացել Թաղավարդ գյուղի բնակիչ, 1989թ. ծնված Երվանդ Կարոյի Ֆիրյանը: ՊԲ առաջապահ զորամասերի կողմից ձեռնարկված պատժիչ գործողությունների արդյունքում՝ հակառակորդի նախահարձակ ակտիվությունը ճնշվել է: ԼՂՀ պաշտպանության նախարարությունը խստորեն դատապարտեց Ադրբեջանի կողմից իրադրության սրումը և հայտարարում, որ ստեղծված իրավիճակի հետևանքների ողջ պատասխանատվությունն ընկնում է հակառակորդ երկրի ռազմաքաղաքական ղեկավարության վրա: Ըստ Թաղավարդի գյուղապետ Լևոն Ալավերդյանի Երվանդը` գլխի շրջանում է վիրավորվել, վիրակապ են դրել: Երվանդ Ֆիրյանը զբաղվում է գյուղատնտեսությամբ, վիրավորվել է հողամասում աշխատելու ընթացքում: Տավուշի մարզի Բերքաբեր գյուղում մարտի 25-ին ուշ երեկոյան հակառակորդի արձակած կրակոցների հետևանքով նյութական մեծ վնաս է հասցվել բնակիչներից մեկին: Ադրբեջանցիների կրակոցի հետևանքով պայթյուն է առաջացել բնակիչներից մեկի հյուրասենյակում: Բարեբախտաբար, զոհեր և վիրավորներ չկան, հայտնել էր Բերքաբերի գյուղապետ Արթուր Մադաթյանը: Բերքաբերում իր տան մոտ հրազենային վիրավորում է ստացել ՀՀ քաղաքացի 64-ամյա Նորիկ Ալիխանյանը, մեկ այլ քաղաքացու տնտեսությանը հասցվել է մեծ վնաս: Մոսկվան նկատե՞ց Ադրբեջանի ագրեսիան Ռուսաստանը շարունակում է հետևողական ջանքեր գործադրել, որպեսզի Լեռնային Ղարաբաղի շուրջ հակամարտությունը կարգավորվի, հայտարարել է ՌԴ նախագահի մամլո քարտուղար Դմիտրի Պեսկովը: Նա նշել է, թե իրավիճակն այնպիսին է, որ պետք է ավելի լավը մաղթել: Սակայն նա վստահություն է հայտնել, որ գործընթացը տեղում չի դոփի. «Դեռևս պարծենալու ոչինչ չկա, միակ ելքն այն է, որպեսի «հնգյակը» բարենպաստ պայմաններ ստեղծի և՛ Երևանի, և՛ Բաքվի համար»: Պեսկովն ընդգծել է, որ իրավիճակի կարգավորմանը պարբերաբար խանգարում են հակամարտության կողմերից մեկի դիրքորոշման անվերապահ հայտարարությունները, ինչպես նաև իրավիճակը կարգավորելու համար զենքի կիրառման կողմերի պատրաստակամությունը: Պեսկովի վերոհիշյալ հայտարարությունը կարելի է Մոսկվայի կողմից Ադրբեջանի ուղղությամբ առաջին ակնարկը համարել: Սա նույնիսկ կարելի է սենսացիոն ակնարկ համարել: Թեև Պեսկովը կոնկրետ չի մատնանշել Ադրբեջանին` որպես իրավիճակի պատասխանատու, այնուամենայնիվ, պարզ է, որ խոսքը վերաբերում է Ադրբեջանին: Հավանաբար, Մոսկվան այլևս չի ցանկանում անարձագանք թողնել Ռուսաստանին ուղղված քննադատությունները` կողմերից մեկին շարունակաբար զինելու ու Ալիևի սանձարձակությանը նպաստելու առումով, և ստիպված է այս փուլում արձագանքել ու պատասխանատվության սլաքները դեպի Բաքու ուղղել: Բանն այն է, որ հիմա միջնորդները սպասում են Բաքվի պատասխանին` սահմանային միջադեպերի ուսումնասիրության մեխանիզմի շուրջ: Բաքուն մերժում է, եւ այդ մերժման պատասխանատվությունն էլ որոշակիորեն կարող է ընկնել Ռուսաստանի վրա: Այդ իսկ պատճառով, Մոսկվան, կարծես, իրեն ապահովագրում է: Օրերս նաև Ռուսաստանի ԱԳՆ-ն է անդրադարձել Ղարաբաղյան կարգավորման գործընթացին: Ռուսաստանը հայկական և ադրբեջանական կողմերի հետ հավասարապես ցանկանում է այնպիսի բարդ խնդրի լուծում, ինչպիսին Լեռնային Ղարաբաղի հակամարտությունն է՝ ասել է Ռուսաստանի ԱԳՆ պաշտոնական ներկայացուցիչ Մարիա Զախարովան. «Մեր նպատակների իսկությունն ապացուցված է։ Մենք ոչ թե հավասարապես մյուս համանախագահների, այլ հավասարապես ադրբեջանական և հայկական կողմերի ցանկանում ենք այդ շատ բարդ իրավիճակի կարգավորում»: Զախարովայի խոսքով՝ Մոսկվան ցանկանում է, որպեսզի այդ խնդիրը դուրս գա օրակարգից, և հակամարտությունը լուծվի միջազգային իրավունքի հիման վրա։ Սպասենք, թե ինչ կարձագանքեն Բաքվից ռուսական կողմի անսպասելի հայտարարությանն ի պատասխան: Թամար Բագրատունի