Հայաստանին մինչև «վերջին խազը» պատժելուց օր առաջ

ՀԱՊԿ-ում ծագած հարցերը պետք է լուծվեն միասնական կոնսենսուսի հիման վրա, քանի որ բոլոր երկրները շահագրգռված են, որ կազմակերպությունն աշխատի ու մեր ընդհանուր անվտանգության ապահովման մեջ ունենա այն ներդրումը, որը բոլորը նրանից ակնկալում են, այս մասին այսօր լրագրողներին ասել է Հայաստանում ՌԴ դեսպան Սերգեյ Կոպիրկինը։ «Գլխավոր քարտուղարի հարցը քննարկվում է ու ես համոզված եմ, որ այն կլուծվի այնպես, որ մեր կազմակերպությունը դուրս գա այս իրավիճակից էլ ավելի ամրացած, այդ թվում՝ ՀԱՊԿ կանոնադրային դրույթների պարզեցմամբ ու լրամշակմամբ», - ասել է Սերգեյ Կոպիրկինը։ Դեկտեմբերի 6-ին ՀԱՊԿ-ի հավաքը Սանկտ-Պետերբուրգում կարող է մի դեպքում Հայաստանի համար ոչ բացասական հունով ընթանալ, եթե որոշում կայացվի, որ ՀԱՊԿ քարտուղարի պաշտոնը շարունակի կատարել ներկայիս ժամանակավոր պաշտոնակատար Վալերի Սեմերիկովը: Բելառուսի ներկայացուցչի նշանակումը կնշանակի Հայաստանին մեկ տարի շուտ զրկել քարտուղարի պաշտոնի ստանձնումից: Վալերի Սեմերիկովի պաշտոնավարման շարունակությունը կարող է Մոսկվայի համար՝ կազմակերպությունում կայունությունը պահպանելու լուծման տարբերակ համարվել: Այսինքն, ամեն ինչ կախված է լինելու նրանից, թե Մոսկվան ինչ կորոշի՝ Հայաստանին մինչև «վերջին խազը» պատժե՞լ, թե՞ միջանկյալ որոշում ընդունել: Ի դեպ, Հայաստանում Ռուսաստանի դեսպան Սերգեյ Կոպիրկինը հայտարարել է, թե «Ռոսատոմը» Հայաստանին կարող է առաջարկել հեռանկարային և հետաքրքիր մշակումներ», որոնք կարող են համապատասխանել էլեկտրաէներգիայի կարիքների առանձնահատկություններին: Նրա խոսքով՝ ատոմային էներգիան Հայաստանի և Ռուսաստանի միջև համագործակցության ռազմավարական ուղղություններից է: «Մեծամորի ԱԷԿ-ի կյանքը երկարաձգելու նպատակով մինչև 2026 թվականն իրականացվում է ծրագիր: Չեմ բացառում, որ որոշակի փուլում կարող է հարց առաջանալ հետագա երկարաձգման վերաբերյալ: Բայց սա պահանջում է լուրջ, հանգամանալից և մանրամասն վերլուծություն` կայանի անվտանգությունն ապահովելու համար», - ասել է Ս.Կոպիրկինը: Նա նաև հայտնել է, որ քննարկվում է Մեծամորի ԱԷԿ-ի աշխատանքի ժամկետի ավարտից հետո ատոմային էներգետիկայի ոլորտում համագործակցության հեռանկարներն ուսումնասիրելու համար հայ-ռուսական աշխատանքային խումբ ստեղծելու հարցը: Ռուսական կողմն, ինչպես երևում է, հեռանկարային և հետաքրքիր մշակումներով՝ Հայաստանում արմատապես հաստատվելու ուղղությամբ հերթական քայլերն է իրականացնում՝ էներգետիկ մենաշնորհը պահպանելու նպատակով: Մետաքսյա Շալունց