Եթե Փաշինյանը բացակայի դեկտեմբերի 6-ին

Դժվար է ստիպել Ալիևին լռել և չխոսել ՀԱՊԿ-ի գլխավոր քարտուղարի հարցի, այս կառույցին Հայաստանի անդամակցման մասին։ Ի վերջո, նա ինքնուրույն, չափահաս մարդ է, և թվում է, թե այս հարցերին խցկվելն իմաստ չունի, բայց հաշվի առնելով լարված փոխհարաբերությունները Հայաստանի և Ադրբեջանի միջև, դժվար է չհավատալ, որ նա դիտավորյալ է այդպես վարվում, որպեսզի վատություն անի Հայաստանին։ «Առաջին լրատվական»-ի հետ զրույցում խոսելով ՀԱՊԿ-ի ճգնաժամի և կազմակերպության ներքին հարցերին Ադրբեջանի միջամտության մասին՝ այսպիսի գնահատականներ է տվել Ռուսաստանի Պետդումայի պատգամավոր, ԱՊՀ երկրների ինստիտուտի տնօրեն Կոնստանտին Զատուլինը: Զատուլինը չգիտի, թե ի՞նչ լուծում կտրվի ՀԱՊԿ գլխավոր քարտուղարի նշանակման հարցին, այն կլուծվի իրավակա՞ն, թե՞ այսպես ասած՝ քաղաքական դաշտում։ «Այս պարագայում շատ դժվար է սահմանել, թե ո՞րն է իրավականը և ո՞րն է քաղաքականը, որովհետև գլխավոր քարտուղարի նշանակումը քաղաքական կազմակերպությունում, անշուշտ, քաղաքական հարց է։ Այն պետք է լուծվի այդ կազմակերպության կանոնադրության համապատասխան։ Եվ սա հենց այն դեպքն է, երբ կանոնադրության մեջ սահմանված չէ, թե նման դեպքերում ինչպե՞ս պիտի լուծվի խնդիրը, և դա ինտրիգ է առաջացնում, որը, ինչպես գիտեք, ձգվելու է առնվազն մինչև դեկտեմբերի 6-ը։ Իմ անձնական կանխազգացումն այն է, որ ամենայն հավանականության իրավիճակը կսառեցվի, և նախկին գլխավոր քարտուղար Յուրի Խաչատուրովին պաշտոնավարման համար տրամադրված մնացած ժամանակում գլխավոր քարտուղարի պարտականությունները կշարունակի իրականացնել պաշտոնակատարը։ Բայց սա ընդամենը կանխազգացում է։ Նա սա համարում է ստեղծված իրավիճակում՝ քիչ թե շատ անցավ տարբերակն է բոլորի համար։ «Ցանկացած այլ տարբերակ, օրինակ` այն, ինչ առաջարկում է Հայաստանը կամ այն, ինչ առաջարկում է Բելառուսը, հղի վեճերով, պառակտումներում»։ Ակնհայտ է, որ տեղի ունեցածը՝ գլխավոր քարտուղարի փոխարինումը Հայաստանի կողմից, մեղմ ասած՝ անսպասելի էր Ռուսաստանի համար։ Հիմա Ռուսաստանը՝ «չեզոքի» դիրքում: Բայց ստեղծված վիճակում բացառապես Ադրբեջանի նախագահի պահվածքը նկատելը Ռուսաստանի կողմից, մեղմ ասած՝ «բլեֆ» է, Մոսկվայի սրտով է, թե Ալիևի, թե Լուկաշենկոյի ցինիկ պահվածքը: Մոսկվան էլ յուրովի է պատժում Հայաստանին՝ Մինսկի ու Բաքվի ձեռքով: Իրավիճակը ողջ պատասխանատվությունն, այսպես, թե այնպես Հայաստանի ուսերին: Բացի այդ, Նիկոլ Փաշինյանը մեկնեց արձակուրդ՝ քարոզարշավի մասնակցելու համար: Պարզ չէ, թե դեկտեմբերի 6-ին Սանկտ-Պետերբուրգում ի՞նքն է մասնակցելու ՀԱՊԿ-ականների հանդիպմանը: Հավաքական անվտանգության պայմանագրի կազմակերպության գլխավոր քարտուղարի ընտրությունը տեղափոխվել է դեկտեմբերի 6-ին Սանկտ Պետերբուրգում կայանալիք հանդիպմանը: Եթե Փաշինյանը մասնակցելու է այդ հավաքին, ապա ինչպե՞ս՝ նա արձակուրդում է... ՀԱՊԿ-ականների համար առնվազն անհասկանալի կլինի՝ վարչապետի պաշտոնակատարի, այն էլ՝ արձակուրդում գտնվող պաշտոնակատարի մասնակցությունը: Եթե Փաշինյանը չմեկնի Սանկտ Պետերբուրգ, ապա ըստ ամենայնի՝ դա կարող է անել ՀՀ նախագահ Արմեն Սարգսյանը: Դեպքերի նման ընթացքն արդեն իսկ մի քանի օր է, ինչ քննարկվում է Հայաստանում: Արմեն Սարգսյանի այցը համարվում է իրավիճակը լիցքաթափող ելք՝ ստեղծված լարված մթնոլորտում: Թամար Բագրատունի