Նուրբ բացահայտում ռուս-թուրքական գործարքի մասին՝ Արցախի հարցով

Թուրքիայի նախագահի խոսնակ Իբրահիմ Քալընը Անկարայի համալսարաններից մեկում կազմակերպված Ռուս-թուրքական հասարակական ֆորումի ժամանակ անդրադարձել է Լեռնային Ղարաբաղի հակամարտությանը՝ Հայաստանին կոչ անելով դադարեցնել «ադրբեջանական հողերի օկուպացիան»: Թուրքական «Աքշամ» պարբերականի փոխանցմամբ, Քալընը իր խոսքում, մասնավորապես նշել է. - «Որպես Մինսկի խմբի անդամ, Ռուսաստանը մեծ դեր ունի Լեռնային Ղարաբաղի հիմնախնդրի կարգավորման հարցում: 1992 թվականին կազմավորված Մինսկի խումբը, ցավոք, մինչև օրս ակնկալվող արդյունք չի գրանցել, ինչի հետևանքով ղարաբաղյան հարցը շարունակում է մնալ Կովկասի սառած ճգնաժամերից մեկը: Այս հարցում մեր դիրքորոշումը շատ հստակ է: Բազմիցս նախաձեռնությամբ ենք հանդես եկել Հայաստանի կողմից ադրբեջանական հողերի օկուպացիան դադարեցնելու և կովկասյան տարածաշրջանում խաղաղության մթնոլորտի վերահաստատման ուղղությամբ: Խնդրի շուրջ սերտ համագործակցել ենք ռուս գործընկերների հետ: Սակայն հերթական միջամտության հետևանքով գործընթացը խափանվել է: Ժամանակն է, որ ադրբեջանական հողերը վերադարձվեն Ադրբեջանին, Հայաստանը վերջ տա օկուպացիային: Դրանից ամենաշատը Հայաստանը կշահի: Մենք Հայաստանի նկատմամբ կանխակալ մոտեցում չունենք: Այս հարցի լուծումից ամենից առավել Հայաստանը օգուտ կքաղի և Կովկասում կհաստատվի կայունության ու խաղաղության մթնոլորտ»: Այս հայտարարությանը կարելի էր առանձնապես ուշադրություն չդարձնել, որովհետև պաշտոնական Անկարայի ներկայացուցչի դիրքորոշման մեջ նոր բան չկա՝ Հայաստանի պահանջներ ներկայացնելիս: ԼՂ հարցում Թուրքիայի դիրքորոշումը միշտ էլ պարզ է: Սակայն կա մի նրբություն՝ Թուրքիայի նախագահի խոսնակ Իբրահիմ Քալընը Անկարայի համալսարաններից մեկում կազմակերպված Ռուս-թուրքական հասարակական ֆորումի ժամանակ է դժգոհում ԵԱՀԿ Մինսկի խմբից ու Ռուսաստանի դերը կարևորում: Այսինքն՝ մի բան, որը կարող է դուրեկան լինել Մոսկվային: Բացի այդ, կա մի ուշագրավ հանգամանք ևս, երբ Թուրքիայի նախագահի խոսնակը նշում է՝ «...խնդրի շուրջ սերտ համագործակցել ենք ռուս գործընկերների հետ: Սակայն հերթական միջամտության հետևանքով գործընթացը խափանվել է»: Անկարան, փաստորեն ակնարկում է, որ Մոսկվայի հետ բանակցություններ է վարել, ըստ ամենայնի՝ հայկական կողմից զիջումներ կորզելու նպատակով, սակայն, ինչ-որ բան գործընթացին խանգարել է: Թամար Բագրատունի