Մենք ու երեք հարևանների խորացող ռազմական համագործակցությունը
Բաքվում երեկ կայացավ Ադրբեջանի պաշտպանության նախարար Զաքիր Հասանովի, Թուրքիայի գլխավոր շտաբի պետ Յաշար Գյուլերի և Վրաստանի զինված ուժերի գլխավոր շտաբի պետ Վլադիմիր Չաչիբայի հանդիպումը, որի արդյունքում կողմերն արձանագրություն ստորագրեցին: Հանդիպմանը քննարկվել են եռակողմ ձևաչափով համագործակցության զարգացման, տարածաշրջանային կայունության, այդ թվում՝ տարածաշրջանում իրականացվող ծրագրերի անվտանգության ապահովման և մի շարք այլ հարցեր: Ավելի վաղ Ադրբեջանի պաշտպանության նախարար Զաքիր Հասանովը հայտարարել էր, որ Ադրբեջանի, Թուրքիայի և Վրաստանի պաշտպանության ոլորտի պաշտոնատար անձանց՝ արդեն երրորդ անգամ անցկացվող եռակողմ հանդիպումը ռազմավարական առումով համագործակցության վառ օրինակ է: «Հանդիպման հիմնական նպատակն է տարածաշրջանում խաղաղության և կայունության հաստատման մեջ ներդրում ունենալը, երեք հարևան պետությունների կողմից իրականացվող ռազմավարական տնտեսական ծրագրերի անվտանգության ապահովումը, երեք պետությունների զինված ուժերի միջև համագործակցության խորացումը: Վստահ եմ, որ այս նիստը կանցկացվի բարձր մակարդակով»,- նշել է Հասանովը: Թուրքիայի զինված ուժերի գլխավոր շտաբի պետ Յաշար Գյուլերն էլ ասել էր, որ Ադրբեջանը, Թուրքիան և Վրաստանը հաջողությամբ ընդլայնում են ռազմական կապերը: Նրա խոսքով՝ երեք երկրների ռազմական կապերը հասել են ռազմավարական մակարդակի: «Երկկողմ և եռակողմ հանդիպումներ անցկացնելով՝ մենք կքննարկենք իրավիճակը տարածաշրջանում: Ռազմական կապերը հաջողությամբ զարգանում են: Հավատում եմ, որ այսօր անցկացվող հանդիպմանը կգրանցվեն շատ կարևոր արդյունքներ»,- ասել էր Գյուլերը: Փաստացի, երեկ Բաքում կայացած եռակողմ հանդիպմանը՝ Թուրքիայի Զինված ուժերի գլխավոր շտաբի պետ Յաշար Գյուլերը ասել է, որ Թուրքիայի, Ադրբեջանի և Վրաստանի ռազմական համագործակցությունը հասել է ռազմավարական մակարդակի: Նա հայտարարել է, որ Անկարան պաշտպանում է Ադրբեջանի և Վրաստանի տարածքային ամբողջականությունը: Իսկ Վրաստանի Զինված ուժերի գլխավոր շտաբի պետ Վլադիմիր Չիչիբայան ասել է. «Տարածաշրջանում սպառնալիքներն աճում են, ինչը կարող ենք կանխել միացյալ ջանքերով»: Ադրբեջանի պաշտպանության նախարարը հանդիպումից հետո լրագրողներին ասել է, թե եռակողմ հանդիպմանը քննարկել են տարածաշրջանի հասարակական-քաղաքական իրավիճակը, տարածաշրջանային ռազմավարական ծրագրերի անվտանգությունը ապահովելու, տարածաշրջանի խաղաղությանը և կայունությանը աջակցելու հարցեր: «Հանդիպմանը ևս մեկ անգամ հայտարարվել է սահմանների անձեռնմխելիության և երկրների ինքնիշխանության մասին»,- ընդգծել է Հասանովը: Կողմերը հաստատել են 2019-ի գործողությունների պլանը ու հանդիպման արդյունքներն ամփոփող արձանագրություն ստորագրել: Այսպես, Հայաստանի երեք հարևան երկրները խորացնում են համագործակցությունը ռազմական ոլորտում՝ վերահաստատելով իրենց դիրքորոշումը երեք պետությունների տարածքային ամբողջականությանը: Ադրբեջան, Վրաստան, Թուրքիա համագործակցությունը՝ նաև ռազմական ոլորտում նորություն չէ: Այն ավելի է խորանում, և մենք դրա ականատեսն ենք: Խնդիրն այստեղ Հայաստանն է, թե ինչով պատասխանում՝ Հայաստանի, որպես տարածաշրջանի խաղացող պետություն: Կամ՝ առհասարակ, պատասխանո՞ւմ է, նախաձեռնողական քաղաքականություն վարո՞ւմ է, թե՞ ամեն ինչ թողնված է ինքնահոսի: Մետաքսյա Շալունց
Հետևեք մեզ Viber-ում
