Մանվել Գրիգորյանին սպանելու որոշում ընդունեք

Տուշոնկի գործով կալանավորված Մանվել Գրիգորյանը, որի պաշտոնական մեղադրանքը ապօրինի կերպով ռազմամթերք ձեռք բերելու, պահելու, ինչպես նաև մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու մասին է, կալանավայրում ամեն օր պայքարում է կյանքի համար, նրա պաշտպաններն արդեն մի քանի ամիս է ահազանգում են, որ Գրիգորյանը դանդաղ մահանում է, նրա վերջույթներում փտախտ է անգամ սկսվել, իսկ երկու ամիս առաջ փորձաքննությամբ հաստատվել է, որ Գրիգորյանը տառապում է մի շարք հիվանդություններով, այդ թվում ծանր աստիճանի շաքարային դիաբետով և կյանքին վտանգ սպառնացող մեկ այլ՝ լուրջ հիվանդությամբ, որը քաղցկեղն է, գեներալ Գրիգորյանի մոտ այն արդեն երրորդ աստիճանի է: Վերջերս Գրիգորյանի կալանքի երկարաձգման հարցը քննվեց Վերաքննիչ դատարանում, բժշկական փորձաքննության արդյունքներն ուղարկվել են նաև այնտեղ, սակայն դատարանքը գտավ, որ Մանվել Գրիգորյանը պետք է շարունակի մնալ կալանքի տակ: Սիրո եւ հանդուրժողականության հեղափոխական իշխանությունը ասես որոշել է նրան սպանել բանտում: Երեկ էլ Նիկոլ Փաշինյանն է լրագրողների հետ զրույցում ասել, որ իր ձեռքի տակ փաստ չկա, որ Մանվել Գրիգորյանի առողջական վիճակն անհամատեղելի է նրա կալանքի հետ․ «Այդ հարցով դիմեք դատական ու քննչական մարմիններին: Հիմա մարդիկ կան, որ գրավով ազատ են արձակվել, հետո կալանավորվել են: Դա իրավական գործընթաց է։ Եթե չեմ սխալվում, դատաբժշկական փորձաքննություն նշանակվել է եւ եզրակացություն եղել է: Թող դատարանն ու քննչական մարմինը որոշեն: Այս պահին իմ ձեռքի տակ չկա փաստ, որը վկայում է, որ Մանվել Գրիգորյանի առողջական վիճակն անհամատեղելի է նրա կալանքի հետ», ասել է Փաշինյանը՝ ակնարկելով, որ ինքը կապ չունի անկախ դատարանների հետ: Իրականում մենք տեսնում ենք, թե Փաշինյանը որքան մանրամասն է տիրապետում գրեթե բոլոր քրեական գործերի նյութերին, հենց այդ պատճառով է, որ չենք կարող հավատալ, թե նա տեղյակ չէ Մանվել Գրիգորյանի գործից: Բա մի քանի օր առաջ Գեղարքունիքում ասում էիք, թե սիրում եք բոլորին, որ Հայաստանում երեք միլիոն վարչապետ կան, որ բոլորը օրենքի առաջ հավասար են: Միթե չեք լսում այդ մեկ վարչապետի պաշտպանների ահազանգը, միթե ձեզ չի հուզում, որ այդ ահազանգը մարդու առողջության, մահանալու մասին է, սա՞ է ձեր սիրն ու հանդուրժողականությունը, սա է ձեր հումանիզմը: Ընդունելով հանդերձ, թե Մանվել Գրիգորյանը ինչպիսի հանցագործություններ է անցյալում գործել, որքան մարդու է կյանքից զրկել, բայց հասկանանք, մենք գնում ենք իր ճանապարհով, թե նոր՝ օրինական Հայաստան ենք կերտում: Ի վերջո, նրա ազատությունը երաշխավորվում է օրենքով, որը դուք խախտում եք պարոն վարչապետ: ՀՀ կառավարությունը 2006թ. մայիսի 26-ին որոշում է ընդունել, որով սահմանվել են հիվանդություններ, որոնց կրողները պարտադիր ազատվում են կալանավայրից, անկախ պատժի չափից կամ մեղադրանքի ծանրությունից, եթե դատավճիռ դեռ չկա: Մանվել Գրիգորյանը տառապում է այդ հիվանդություններից առնվազն մեկով` քաղցկեղով, որի երրորդ աստիճանը ֆիքսված է 825 որոշման մեջ որպես կալանքից ազատման հիմք, հարցն այն է՝ ի՞նչ հիմքով եք Մանվել Գրիգորյանին պահում կալանքի տակ: Մանվել Գրիգորյանին կալանքի տակ պահելն ապօրինություն է: Նրան կարելի է դատել, դատավճիռ նշանակել, բայց բանտ տանել այլևս չի կարելի: Եթե ձեր խնդիրը նրան բանտում սպանելն է, ուրեմն գոնե փոխեք կառավարության համապատասխան որոշումը: Անի Սահակյան