Ադրբեջանական պարբերականը չի էլ թաքցնում, որ Լուկաշենկոյի գործողությունների հետևում Բաքուն է կանգնած, և նրանք համատեղ են օգտվում Փաշինյանի սխալներից

Ադրբեջանական պարբերական Haqqin.az-ը, իր այսօրվա խմբագրականում, արդեն չի էլ թաքցնում, որ ՀԱՊԿ-ի գլխավոր քարտուղարի շուրջ աղմուկը հրահրված է եղել նաև Բաքվից: Ըստ պարբերականների, թեև Ադրբեջանը ՀԱՊԿ-ի անդամ չէ, ուշադիր հետևում է այս կառույցում ընթացող գործընթացներին: Պարբերականը խոստովանում է, որ Հայաստանի մեկուսացման խնդիրը նույնիսկ այս կառույցում միշտ Բաքվի գլխավոր նպատակներից է համարվել: Ինչ վերաբերվում է վերջին դեպքերին, ապա այստեղ Բաքվի դաշնակիցները օգտվեցին Փաշինյանի սխալներից և փորձում են վերջնականապես մեկուսացնել Երևանին՝ զրկելով նրա ներկայացուցչին՝ շարունակել զբաղեցնել ՀԱՊԿ-ի գլխավոր քարտուղարի պաշտոնը ևս 1,5 տարի: Մեր կողմից նշենք, որ Աստանայում ընդունվեցին մեզ համար վտանգավոր նաև այլ որոշումներ, որի մասին դեռ չի արծածվում մեր մամուլում: Խոսքը վերաբերվում է, կազմակերպության դիտորդ ինստիտուտի հասկացողության ընդունմանը: Ավելին, այն ունենալու է բավականին լայն լիազորություններ, մասնակցելու է կազմակերպության գրեթե բոլոր միջոցառումներին, այսպես ասած, ինտեգրվելու է ՀԱՊԿ-ի բոլոր տեսակի կազմակերպչական աշխատանքներին, բացառությամբ զրկված է լինելու քվեարկելու իրավունքից: Շատ դիտորդների կարծիքով, այս որոշումը կազմակերպել էին Լուկաշենկոն ու Նազարբաևը՝ հատուկ Իլհամ Ալիևի համար: Բանն այն է, որ ՀԱՊԿ-ի խորհրդարանական վեհաժողովում դիտորդի ինստիտուտը միշտ գործել է, սակայն այն շատ սիմվոլիկ դեր է կատարել: Եվ ահա Լուկաշենկո - Նազարբաև հայտնի զույգը փորձում է աստիճանաբար կազմակերպության անդամ դարձնել Բաքվին: Նախ դրա արդյունքում կուժեղանան իրենց դիրքերը՝ հակակշռելով Մոսկվային, նաև Բաքվի հետ նրանք ունեն երկարաժամկետ ու հեռահար նպատակներ: Մինչդեռ Հայաստանը նրանց համար օտարածին մարմին է, որը հիմնականում իր խնդիրները կոորդինացնում է Մոսկվայի հետ: Խաչատուրովի գործով Երևանը հարված հասցրեց այդ կառույցի հեղինակությանը, և բնականաբար, լուրջ առիթ տվեց մեր փաստացի հակառակորդներին անցնել հակագրոհի: Սա է իրականությունը: zham.am Արտակ Հակոբյան