Արարատի մարզում տեղի ոստիկանության ծառայողը խմած վիճակում Mitsubishi-ով բախվել է էլեկտրասյանը

Այսօր՝ նոյեմբերի 12-ին, խոշոր ավտովթար է տեղի ունեցել Արարատի մարզում: Ժամը 02:00-ի սահմաններում Վեդի քաղաքի բնակիչ, 34-ամյա Հայկ Հախվերդյանը Վեդի քաղաքի Արարատյան փողոցում իր վարած Mitsubishi Pajero մակնիշի 35 ԼC 765 համարանիշի ավտոմեքենայով դուրս է եկել ճանապարհի երթևեկելի գոտուց, բախվել ճամփեզրի էլեկտրասյանը, ինչի հետևանքով տապալվել է նաև գազատար խողովակի հենասյունը, այնուհետև բախվել նույն փողոցի 59 տան ցանկապատին: Ինչպես հայտնում է ֆոտոլրագրող Գագիկ Շամշյանը, վթարի հետևանքով Հ. Հախվերդյանը մարմնական վնասվածքներով տեղափոխվել է Վեդիի բժշկական կենտրոն: Դեպքի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ հետաքննիչ Արմեն Գաբրիելյանի գլխավորությամբ, ում կողմից փաստի առթիվ նյութեր են նախապատրաստվում: Ֆոտոլրագրողի տեղեկություններով՝ վարորդը ենթարկվել է սթափության փորձաքննության, պարզվել է, որ նա եղել է ոչ սթափ (խմած) վիճակում: Գ. Շամշյանի տեղեկություններով՝ Հ. Հախվերդյանը աշխատում է ոստիկանության Արարատի մարզային վարչության Արարատի բաժնում, իսկ մարզի ոստիկանապետ, ոստիկանության գնդապետ Արմեն Գասպարյանի կողմից նշանակվել է ծառայողական քննություն: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: