Բրյուսելում այդքան մարդ զոհվեց. ինչ-որ բան սխալ է. Սանդերս

ԴԱԻՇ ահաբեկչական խմբավորման դեմ ցամաքային գործողության անցկացման գործում գլխավոր դերը պետք է խաղան Մերձավոր Արևելքի մուսուլմանական երկրները: Այս մասին CNN-ին տված հարցազրույցում հայտարարել է սենատոր Բեռնի Սանդերսը, ով Դեմոկրատական կուսակցությունից պայքարում է ԱՄՆ նախագահի պաշտոնի համար։ «Ես միանգամայն համաձայն եմ Հորդանանի թագավոր Աբդալլա II-ի հետ, ով ասել է, որ դա ահաբեկչության պատերազմ է ընդդեմ իսլամի գոյության, և այն վերջիվերջո պետք է վարեն մուսուլմանական զորքերը՝ ԱՄՆ-ի, Մեծ Բրիտանիայի, Ռուսաստանի և այլ երկրների աջակցությամբ»,- ասել է Սանդերսը։ Սանդերսը նշել է, որ ռազմական առումով իրենք իրական առաջընթացի են հասել ԴԱԻՇ-ի դեմ պայքարում։ Նրա խոսքով՝ այդ խմբավորումը այժմ ստիպված է պաշտպանվել և կորցրել է նախկինում վերահսկած տարածքների 40 տոկոսը։ Նա կողմ է արտահայտվել ԱՄՆ-ի և դաշնակիցների միջև հետախուզական տեղեկատվության ավելի որակյալ և լայն փոխանակմանը։ «Երբ Բրյուսելում այդքան մարդ զոհվեց, նշանակում է՝ ինչ-որ բան սխալ է ընթացել։ Սա հետախուզական հանրությանն ուղղված քննադատություն չէ, բայց ինչ-որ բան այնպես չի եղել»,- ասել է սենատորը։