Ռոբերտ Քոչարյանի պաշտպանները դիմել են ՄԻԵԴ
Անմեղության կանխավարկածի, ինչպես նաև պաշտպանության իրավունքի խախտման հարցով ՀՀ երկրորդ նախագահ, «Մարտի 1-ի» գործով մեղադրյալ Ռոբերտ Քոչարյանի պաշտպանական թիմը դիմել է ՄԻԵԴ: Տեղեկությունը Tert.am-ի հետ զրույցում հաստատեց Ռոբերտ Քոչարյանի փաստաբանական թիմի մամուլի խոսնակ Էլեն Առաքելյանը: «Ինչ վերաբերում է մեղադրանքին, ապա տեղեկացնեմ, որ Ռոբերտ Քոչարյանին առաջադրված մեղադրանքի մասով այն փոփոխվել է, սակայն հիմնական փոփոխությունն այն է, որ որոշ դրվագներ պարզապես ավելի մանրամասնեցվել են, սակայն մեղադրանքի էությունը որևէ չափով չի փոփոխվել»,-ասաց նա: Հիշեցնենք, որ Ռոբերտ Քոչարյանը հուլիսին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1 հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։ Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել է անձեռնմխելի, ինչի արդյունքում նա ազատ է արձակվել կալանքից, խափանման միջոց չէր ընտրվել: Այնուհետև ՀՔԾ-ն նրա նկատմամբ խափանման միջոց է ընտրել ստորագրություն չհեռանալու մասին:
Հետևեք մեզ Viber-ում
