Նառան սուս չի մնա

Նոր խորհրդարանին պատրաստվող ԲՀԿ-ի ներսում տիրող իրադարձությունները վերջին շաբաթներին գրավել են հանրային լայն շրջանակների ուշադրությունը: Կուսակցության ղեկավար Գագիկ Ծառուկյանը որոշ ժամանակ առաջ հայտարարեց, որ ընտրությունների ցուցակը կազմում է անձամբ, այն լինելու է նոր ցուցակ, հին դեմքերը տեղ չեն գտնի այնտեղ: Զուգահեռ մամուլում տեղեկություններ հայտնվեցին, որ Ծառուկյանը մեկուսացել է պատգամավորական ֆրակցայից, նույնիսկ ամենավստահելիների հետ չի խորհրդակցում ցուցակի հարցերը, մինչեւ անգամ նույն տեղեկություններով մտադիր է հավատավոր զինվորներին դուրս թողնել քաղաքական գործընթացներից, ի մասնավորի Նաիրա Զոհրաբյանին, Միքայել Մելքումյանին եւ կուսակցության այլ տիտանների չընդգրկել ընտրացուցակ: Քանի որ Ծառուկյանը խնդիր ունի քայլել նոր մարտահրավերներին համընթաց, այն է՝ խորհրդարան տանել Նիկոլ Փաշինյանի ճաշակին հարիր մարդկանց: Սակայն այսօր ԲՀԿ ղեկավարը հերքել է կոնկրետ Նաիրա Զոհրաբյանի վերաբերյալ տեղեկությունը՝ ասելով, որ նա կլինի ցուցակում: «Առանց Նաիրա Զոհրաբյանի «Բարգավաճը» ո՞նց կարող ա լինել, ո՞վ ա ասել, որ Նաիրա Զոհրաբյանը ցուցակում չի լինելու, նա լինելու ա իրա տեղում, նա կուսակցության հիմնադիրներից ա, նա, որտեղ որ պետք ա, պատրաստ ա իր ծառայությունը կատարի»,- ասել է Ծառուկյանը: ԲՀԿ-ի անգերազանցելի ռմբարկուի՝ Զոհրաբյանի լուսանցքում հայտնվելու տեղեկությունները հրապարակ նետվեցին Երեւանի ավագանու ընտրություններին վերջինիս դրսեւորած վարքի հիմնավորմամբ: Նաիրա Զոհրաբյանը քարոզարշավի վերջին ակորդին երկու անգամ շեշտակի հարվածի տակ վերցրեց ոչ միայն քաղաքապետի իշխանության թեկնածու Հայկ Մարությանին ու Փաշինյանի թիմին, այլ անձամբ Փաշինյանին՝ նրան մեղադրելով ներկա իրողությունների եւ իր դեմ ֆեյքային հարձակման համար: Բայց վերջին շրջանում քաղաքական նյարդային գործընթացները, երբ մնացին անցյալում եւ ԲՀԿ ղեկավարը հայտնի հուշագրի ստորագրմամբ իր հավատարմությունը հայտնեց Փաշինյանին, թվում էր, թե նա էլ չի գնա Փաշինյանի հետ առճակատման եւ իր բոլոր քայլերը նա կպլանավորի վերջինիս համաձայնությամբ:Թերեւս այս պատճառով էր, որ անհավանական չէին թվում Նաիրա Զոհրաբյանին խաղից դուրս թողնելու մտադրությունները: Սակայն այսօրվա հայտարարությունը Զոհրաբյանի ցուցակում մնալու վերաբերյալ ըստ էության քաղաքական խելամիտ որոշում է: Ի վերջո, Ծառուկյանի թիմում կարողացել են թացը չորից զատել ու հասկանալ, որ առաջիկա ընտրապայքարն ընթանալու է հստակ դիրքորոշումների, բեւեռների միջեւ: Հանրությանը պետք է հստակ ասել, թե ում եւ ինչի համար ինքը պետք է քվեարկի: Որ չի կարելի կրկնել Երեւանի ավագանու ընտրությունները ու Նիկոլից ավելի Նիկոլ երեւալ: Հետհեղափոխական էյֆորիայի ժամանակներում Նիկոլից ավելի միայն <<Աստված>> պետք է լինել:Այս իրողություն պետք է հստակ թիրախավորել գործող իշխանությանը, հատկապես, որ անցած մի քանի ամիսներին նրանք հասցրել են բոլոր բնագավառներում խոցելի դառնալ: Սկսած արտաքին քաղաքականության քաղաքականությունից, երբ արդեն Ալիեւն անձամբ է իր ասելիքը հնչեցնում, Բոլթոնի այցից ու այդ այցով ռազմավարական գործընկերների մոտ անհաղթահարելի խնդիրներ ստեղծելուց, Իրանի հետ անհեռանկար ու վտանգավոր հարաբերություններից, վերջացրած ներքին խնդիրներ՝ տնտեսական քաղաքականության բացակայություն, առողջապահական ոլորտի պայթունավտանգ վիճակ, մի խոսքով՝ ցանկը կարելի է երկարացնել… Իհարկե, ժամանակը լինելու է այս իրավիճակի դատավորը, բայց ընտրությունները պատեհ պահ են ստեղծում առնվազն մատնացույց անելու խնդիրների տեղը: Իսկ ով, եթե ոչ Նաիրա Զոհրաբյանը, որը Ծառուկյանի թիմում ամենաքաղաքական, ամենավճռական  գործիչներից մեկն է: Բացի դա նա ունի անգերազանցելի հատկանիշներ, Նիկոլի շկոլան անցած նախկին լրագրողը մինչ այս պահը միակն է, ով կարողանում է Նիկոլի հետ իր լեզվով խոսել, կռվի դուրս գալ գոնե նույն զենքով, թեպետ քիչ չեն դեպքերը, երբ նա իր ինտելեկտով եւ գերազանցել է ուսուցչին ու համարժեք հակազդելու փոխարեն նրան փաստի առաջ կանգնեցրել:Նույնիսկ ՀՀԿ-ից մինչ այս պահը չի գտնվել որեւէ մեկը, որը կարող էր այդպիսի հեռահար պատերազմի մեջ մտնել Նիկոլ Փաշինյանի հետ: Եթե կա նման պոտենցիալ, ուրեմն տվյալ սուբյեկտն այնքան խոցելի է, որ իրեն չի կարող թույլ տալ նման առճակատման:Ասել է թե՝ եկել է ժամանակը, որպեսզի Ծառուկյանը ոչ թե սաստի Նաիրա Զոհրաբյանին՝Նառա , դու սուս, այլ ճիշտ հակառակը, զորքը հանձնի նրա հրամանատարությանը: Անի Սահակյան