Խոշոր ավտովթար Երևանում. 38-ամյա վարորդը Mercedes-ով բախվել է էլեկտրասյանը, տապալել այն և գլխիվայր շրջվել

Այսօր՝ նոյեմբերի 5-ին, խոշոր ավտովթար է տեղի ունեցե Երևանում։ Ժամը 15։00-ի սահմաններում Երևանի բնակիչ՝ 38-ամյա Վահե Սուջյանը իր վարած Mercedes մակնիշի 96 VM 096 համարանիշի ավտոմեքենայով Մոնթե Մելքոնյան փողոցում դուրս է եկել ճանապարհի երթևեկելի գոտուց, բախվել էլեկտրասյանն ու գլխիվայր շրջվել։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդը մարմնական վնասվածքներով տեղափոխվել է հիվանդանոց, էլեկտրասյունն էլ հիմքից տապալվել է։ Դեպքի վայր են ժամանել արտակարգ իրավիճակների նախարարության փրկարար ծառայության հրշեջ-փրկարարները, ովքեր հոսանքազրկել են ավտոմեքենան, փակել գազաբալոնն ու սահմանազատել տարածքը։ Օպերատիվորեն ժամանել են Ճանապարհային Ոստիկանության 1-ին սպայական գումարտակի 3-րդ դասակի տեսուչներ Վիտալի Աֆյանն ու Վարազդատ Բաբայանը, ովքեր հետաքրքրասեր քաղաքացիներին ու վարորդնրին մեծ դժվարությամբ հեռացնում են վթարի վայրից։ Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Արսեն Կարապետյանը տեղեկությունը փոխանցել է Ճանապարհային Ոստիկանության ճանապարհատրանսպորտային պատահարների հետաքննության և վարչական վարույթի իրականացման բաժանմունք, որտեղից ժամանել է հերթապահ խումբը՝ բաժանմունքի պետ Խաչիկ Սամվելյանի գլխավորությամբ։ Փաստի առթիվ հետաքննչական բաժանմունքում նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: