ՊԵԿ-ի վարչարարությունը մնացել է նույնը․ մի քանի հեղափոխություններ են պետք․ բաց նամակ

Եղեգնաձորի «Տարոն» ԲԲԸ-ի տնօրեն` Հայկ Իսախանյանը բաց նամակով դիմել է ՊԵԿ նախագահ Դավիթ Անանյանին՝ բողոքելով ՊԵԿ-ի իրականացրած վարչարարությունից։ «Հարգելի պարոն Անանյան. Մենք`տնտեսվարողներս, այս նոր իրականության պայմաններում մտածում  էինք, որ անցյալում են մնացել արհեստական, շինծու դժվարությունները,  որոնք, կարծես թե, կանխամտածված ստեղծել էին ՀՀ-ում`  արդյունաբերությունը, տնտեսությունը քանդելու, լուծարելու, սնանկացնելու եւ արտադրական   հարաբերությունները դժվարացնելու համար: Սակայն դեռեւս ՊԵԿ-ի կողմից իրականացվող վարչարարությունը մնացել է նախկինի նման անփոփոխ երեւի անհրաժեշտ են մի քանի հեղափոխություններ, որպեսզի ՊԵԿ-ի կողմից իրականացվող վարչարարությունում   գերիշխեն, անվերապահորեն կատարվեն Հայաստանի Հանրապետությունում գործող օրենքները եւ օրինական  ուժի մեջ մտած դատական վճիռները, որոնց պայմաններում անդունդի եզրին հասած մեր տնտեսությունը   հնարավորություն կունենա զարգանալ: Մեր Ընկերության նկատմամբ ինչպես նախկինում, այնպես էլ այսօր (արդեն շուրջ քսան տարի) ՊԵԿ-ի   կողմից շարունակում է իրականացվել ոչ իրավաչափ գործողություններ` ընկերությանը հասցնելով սնանկացման, լուծարման  եզրին: ՊԵԿ-ի կողմից  կայացվել է գանձման որոշում 1992 թվականին գոյացած  ինչ-որ թվացյալ պարտքի վերաբերյալ, որը չի արտացոլված Ընկերության մասնավորեցման փաթեթում եւ չի  ամրագրվել «Կառավարության թերթ» ազդագրով: ՊԵԿ-ի կողմից իրականացրած վարչարարությունը մենք   որակում ենք բացահայտ տեռոր մեր Ընկերության նկատմամբ: Նման պայմաններում ցանկացած ներդրող, Կառավարության հրավերքներից ոգեւորված, տեսնելով մեր իրականությունը`չի ցանկանա կատարել ներդրումներ: Հարգելի պարոն Անանյան, պատրաստ ենք եւս մեկ անգամ Ձեր անմիջական մասնակցությամբ քննարկել եւ  գտնել ողջամիտ լուծումներ` գործող օրենքների սահմաններում, որոնք հնարավորություն կտան   Ընկերությանը` վերսկսել արտադրական գործունեությունը, հակառակ դեպքում մենք`Ընկերության 300   բաժնետերերս, ստիպված դուրս կգանք փողոց` ծառացած խնդիրների լուծումն այնտեղ փնտրելու  նպատակով»,- ասված է բաց նամակում: