Կատաղի պայքար է սպասվում

Խորհրդարանում վարչապետի չընտրության հատուկ նիստը Նիկոլ Փաշինյանը վերածեց նախընտրական քարոզարշավի: Այս անգամ նա ուշադրության կենտրոնում պահեց տնտեսության թեման: Փաշինյանը հայտարարեց Հայաստանում տնտեսության կառուցվածքի և փիլիսոփայության տրանսֆորմացիայի գործընթացի մասին: Անդրադարձավ նաև 2019 թվականի բյուջեին «20 մլդ դրամով ավելացրել ենք սոցիալական ծախսերը: 2019 թվականի բյուջեին իներցիոն բյուջե է, ձևավորվել է այն պարամետրերի վրա, որը ժառանգություն ենք ստացել նախկինից: Փոփոխություններն այս բյուջեի վրա ազդեցություն չունեն»,- ասաց նա: Ըստ նրա՝ մի շատ կարևոր խնդիր, այնուամենայնիվ, լուծվել է պարենային գծից ներքև գումար ստացող թոշակառու և նպաստ ստացողների խնդիրը: 85 հազար մարդկանց թոշակներն ու նպաստները բարձրացել են 10 հազար դրամով: «ՀՀ-ում սովալլուկ թոշակառու ու նպաստառու չկա»: Ավետեց, որ եկամտահարկը եկող տարվանից տաս տոկոսով իջնելու է, բայց այն չի ազդելու մինչեւ 150 հազար դրամ աշխատավարձ ստացողների վրա: Ի դեպ, Հայաստանում փոքր թիվ են կազմում մարդիկ, որոնք 150 հազարից ավել աշխատավարձ են ստանում: Փաշինյանը հայտարարեց՝ մայիսից այս կողմ պաշտոնապես ի հայտ է եկել 37 հազար աշխատատեղ, սա նշանակում է, որ գործատուները որոշել են չթաքցնել այդ աշխատատեղերը եւ ստվերից դուրս են եկել: Վարչապետի պաշտոնակատարը շնորհակալություն հայտնեց այդ գործարարներին: Վստահեցրեց, որ տնտեսությունը լայն թափով զարգանալու է, դրա համար տասը փաստ թվարկեց: Ամեն ինչ գնում էր իր նախագծած հունով, մինչեւ ելույթ ունեցավ ՀՀԿ-ական փոխխոսնակ Էդուարդ Շարմազանովը, ով հիշեցրեց՝ երբ Նիկոլ Փաշինյանը նշանակվում էր վարչապետ, խոստանում էր, որ Հայաստանը պետք է թևակոխի թռիչքային զարգացում: «Ես հեռու եմ այն մտքից, որ վեց ամսվա ընթացքում մենք պետք է թռչեինք և ապրեինք դրախտում, բայց խոսեմ փաստերով: Ինչքան աշխատատեղեր է ստեղծվել, ներդրումային միջավայրն ինչպիսին է, ժողովրդի կենսամակարդակը լավացել է, թե վատացել, առաջին անհրաժեշտության ապրանքները թանկացել են, թե՞ էժանացել, մեր կյանքը լավացել է, թե՞ վատացել է»,- հռետորական հարցադրում արեց նա եւ խոսքը շարունակեց փաստերով՝ երկրորդ եռամսյակում առաջինի համեմատ Հայաստանում ներդրումները երեք անգամ նվազել են: Հեղափոխությունից հետո, ըստ նրա, ներդրումային բում էր սպասվում, բայց եկանք կանգնեցինք ներդրումային տաշտակի առջև: Այս տարվա բյուջեով 6.9 տոկոս տնտեսական աճ է գրված, իսկ հաջոդ տարվա բյուջեով 4.2 տոկոս է սպասվում: Ավելին, հաջորդ տարվա բյուջեի նախագծով 3.5 տոկոս գնաճ է նախատեսվում, զրո տոկոս աշխատավարձերի բարձրացում: «Հաջորդը, ինչքան աշխատատեղեր եք բացել, 10-15 աշխատատեղ բացում եք, Հայլուրը մի շաբաթ ցույց ա տալիս: Դա էն դեպքում, երբ Ալավերդու պղնձաձուլարանը փակման ենթակա է դարձել: Ես չգիտեմ՝ ով է մեղավոր, ով մեղավոր չէ, բայց 630 ալավերդցի կանգնած են աշխատանքը կորցնելու վտանգի ու փաստի առջև»,- ասաց նա: Շարմազանովը նկատեց, որ նախկինում իրենց մեղադրում էին կարմիր գծերի, տեսախցիկների համար, բայց հիմա պարզվեց, որ կարմիր գծերը պետք են, որ մանկապարտեզները վերանորոգենք: «Բա հեղափոխության օրերին ձեր կողմնակիցները ներքնաշորերով կամեռա էին փակում, հիմա պարզվեց, դրանց թիվը պետք է ավելացնել»: Խորհրդարանում ուրվագծվեց նախընտրական քարոզարշավի պատկերը, որը պետք է արձանագրել, որ ավելի, քան կատաղի է լինելու: ՀՀԿ-ն ըստ ամենայնի պատրաստվում է ջախջախիչ քննադատության ենթարկել փաշինյանական իշխանությունը, փաստերով ցույց տալով, որ նոր Հայաստանը անգամ հնի կրկնությունը չէ: Անի Սահակյան