Չի բացառվում, որ համաներում հայտարարելու հետևանքով Հայաստանում հանցավորության մակարդակը բարձրանա. Արտակ Զեյնալյան

«Մեր պահանջարկն ավելին է, գումարները քիչ են, պետք է կարողանանք այնպես վերաբաշխենք, որ բյուջեն ոչ թե շարունակի նվազել, այլ աճել, որ ստիպված չլինենք պարտք վերցնել»: Այս մասին, այսօր՝ նոյեմբերի 3-ին, Աժ-ում լրագրողների հետ զրույցում նշեց Արդարադատության նախարարի պաշտոնակատար Արտակ Զեյնալյանը՝ անդրադառնալով 2019 թվականի բյուջեի նախագծին: Զեյնալյանն անդրադարձավ նաև քրեակատարողական հիմնարկների անմխիթար վիճակի մասին հարցին և նշեց, որ կառավարությունում է գտնվում որոշման նախագիծ՝ կառավարության պահուստային ֆոնդից գումար տրամադրելու վերաբերյալ: «Միջոցներ են հայթայթում վերանորոգումներ անելու նպատակով: Գիտեք, առնվազն երկու քրեակատարողական հիմնարկ ենթակա են փոխարնման՝ Նուբարաշեն և Գորիսի ՔԿՀ-ները: Մենք նաև նախատեսել էինք գալիք տարվա ծախսերում նոր քրեակատարողական հիմնարկի մեկնարկի համար մեկ միլիարդ դրամ, ընդհանուրը 4.9 մլրդ է: Սակայն դա դեռ ընդգրկված չէ՝ պայմանավորված բյուջետային միջոցների սղությամբ: Ընթացքում մշտապես վերանորոգման աշխատանքներ կատարվում են տարբեր ՔԿՀ-ներում, եթե մեզ հաջողվի խնայողություններ անել, վերաբաշխումներ կանենք և կիրականացնենք կապիտալ վերանորոգումներ»,- ասաց նա: Հարցին, թե մտավախություն չունե՞ք, որ համաներումից հետո հանցավորության մակարդակը կբարձրանա, Զեյնալյանն արձագանքեց. «Այդպիսի վերլուծություններ, վիճակագրություն եղել են, փորձ կա, որ հանցավորության մակարդակը բարձրանում է: Չի բացառվում նաև, որ Հայաստանում էլ բարձրանա, բայց դա պարտադիր պայման չէ: Կամ այն չափով, ինչ չափով նախկինում եղել է, պարտադիր չէ, որ այդ չափով բարձրանա»: