«Ծռեր»-ից ակնկալվող վտանգը. ինչու իշխանությունը տեղի տվեց

Այսօր ԱԺ արտահերթ նիստում համաներման նախագծին միաձայն կողմ քվեարկեց 72 պատգամավոր: Նախագիծը ընդունման համար չնայած հարկավոր էր ընդամենը ձայների մեծամասնություն, սական պատգամավորները այսօր աննախադեպ հետաքրքրություն էին ցուցաբերել, հավանաբար շատերը բերդում գտնվող ինչ-ինչ խմբերի խոսք էին տվել, որ կողմ կքվեարկեն, ինչն էլ արեցին: Հիշեցնենք, որ այս համաներումը կիրառվում է Էրեբունի Երեւանի հիմնադրման 2800 ամյակի եւ Առաջին հանրապետության հիմնադրման 100-ամյակի կապակցությամբ: Համաներման արդյունքում ՔԿՀ-ներից ազատություն կվերադառնա 342 անձ, իսկ համաներման շահառու են ընդհանուր առմամբ ավելի քան 6500 անձ: Նշենք նաեւ, որ իշխանությունները պնդում են, որ այն աննախադեպ է նախորդ տարիների համաներումների հետ համեմատած, իսկապես, նրանք չեն սխալվում եւ համաներումնն աննախադեպ է իր խտրական մոտեցմամբ։ Փորձագետներն ու իրավաբանական շրջանակները նույնպես չեն թաքցնում, որ իշխանությունը չհիմնավորված մոտեցում է դրսեւորել «Սասնա ծռերի» նկատմամբ։ Այն կտարածվի զինված խմբի գրեթե բոլոր անդամների վրա։ Նախագիծը սահմանում է՝«Համաներում հայտարարելու արդյունքում պատժից ազատել. 1) 2016 թվականի հուլիսի 17-ից հուլիսի 31-ը Հայաստանի Հանրապետության ոստիկանության պարեկապահակետային ծառայության գնդի տարածքում հանցագործություն կատարած, վերջիններիս հետ հանցակցած, այդ նպատակով հանցափորձ կամ հանցագործության նախապատրաստություն, հարակից տարածքներում դրանց հետ առնչություն ունեցող հանցագործություն կատարած, ինչպես նաեւ 2015 թվականի ապրիլի 24-ին զանգվածային անկարգությունների նախապատրաստության համար մեղադրվող անձանց նկատմամբ քրեական հետապնդում չհարուցել, հարուցված քրեական հետապնդումը դադարեցնել կամ նրանց պատժից ազատել, եթե դրա դեմ չեն առարկում պատանդառված եւ (կամ) ֆիզիկական վնաս կրած տուժողները: 2) Սույն հոդվածի 11-րդ մասի 1-ին կետը չի տարածվում նույն կետում նկարագրված իրադարձությունների ընթացքում կատարված այն արարքների նկատմամբ, որոնք անմիջականորեն հանգեցրել են մարդու մահվան: 3) Սույն հոդվածի 11-րդ մասի 1-ին կետում նկարագրված հանցագործությունների արդյունքում պատճառված նյութական վնասի հատուցման հարցը կարող է լուծվել քաղաքացիական դատավարության օրենսգրքով սահմանված կարգով»: Փոխարենը Նորքի զինված խմբի վրա այն չի տարածվում։ Հիշեցնենք, որ նշված խումբը վնասազերծվեց 2015 թվականի նոյեմբերին, ի տարբերություն Սասնա ծռերի, այդ խումբը դեռեւս ակտիվ գործողություններ չէր էլ սկսել, ընդամենը մի ամառանոցում հավաքներ էր արել եւ ծրագրել բարձրաստիճան պաշտոնյաների «ոչնչացման» օպերացիա։ Այս խմբի բացահայտումը զուգորդվեց նաեւ զավեշտալի եւ կասկածելի գործողություններով, երբ հանցավոր որջ հանդիսացող առանձնատուն անարգել մուտք գործեցին լրագրողներ, նկարահանող խմբեր։ Համաներումը չի կիրառվելու նաեւ քաղաքագետ Անդրիաս Ղուկասյանի գործի վրա։ Հիշեցնենք, որ Անդրիաս Ղուկասյանը մեղադրվում է 2016թ. հուլիսի 29-ին Երեւան քաղաքում զանգվածային անկարգություններ կազմակերպելու մեջ: Ըստ մեղադրանքի, նա փորձել է միանալ 2016թ. հուլիսի 17-ին ոստիկանության ՊՊԾ գնդի տարածքում գտնվող շենքերը, շինությունները եւ տրանսպորտային միջոցները զավթած «Սասնա ծռերին»: Ու հիմա ստացվում է, որ համաներումն ազդում է «Սասնա ծռերի», բայց ոչ՝ նրանց, ըստ մեղադրանքի, միանալ փորձող մարդկանց վրա: Ինչով է բացատրվում Փաշինյանի վերաբերմունքը Սասնա Ծռերի նկատմամբ, կարծում ենք պարզից էլ պարզ է։ Նիկոլ Փաշինյանը այսկերպ չեզոքացրեց իր դեմ հասունացող վտանգը, որն իրենից ներկայացնում էր այս խումբը, չմոռանանք, որ վարչապետ ընտրվելու առաջին օրերին Ծռերի համակիրները փողոցներ փակեցին՝ պահանջելով ազատ արձակել խմբի տղաներին։ Սակայն մյուս կողմից՝ ռեյտինգային մոդելը չփոփոխելով Փաշինյանը ըստ էության փակում է նաեւ Ծռերի առաջխաղացման ճանապարհը, քանի որ նրանք այս մոդելով ավելի պակաս մրցունակ են, քան ՀՀԿ-ն ու ԲՀԿ-ն։ Անի Սահակյան