Հատուկջոկատայինների խոշոր զորավարժություն՝ Նախիջևանի առանձին համազորային բանակում

Նախիջևանում անկացվել է բանակի և ուժային այլ կառույցների հատուկ նշանակության ստորաբաժանումների համատեղ խոշոր զորավարժություն:Վարժանքներին ներգրավվել են ՀՕՊ և ավիացիոն միջոցներ, հրետանի:Վարժանքներին հետևել է Ադրբեջանի պաշտպանության նախարար Զաքիր Հասանովը: Վարժանքների մասին հայտնում է Նախիջևանի պետական լրատվական գործակալությունը: Ներգրավվել են Առանձին համազորային բանակի, Նախիջևանի սահմանապահ դիվիզիայի, ներքին զորքերի գնդի, պետանվտանգության ծառայության և ԱԻՆ հատուկ նշանակության ստորաբաժանումները: Ըստ ադրբեջանական կողմի՝ մասնակցել է ընդհանուր հազարից ավելի մարդ, ինչը զգալի թիվ է հատուկջոկատայինների համար: Բացի նշյալից, ներգրավվել են նաև 80-ից ավելի զրահապատ և ավտոմոբիլային տեխնիկա, 20-ից ավելի ՀՕՊ միջոց, շուրջ 40 միավոր հրետանի, 10-ից ավելի ավիացիոն միջոցներ, այդ թվում՝ ՍՈւ-25 գրահոչներ, Մի-35 հարվածային ուղղաթիռներ և ԱԹՍ-ներ: Զորավարժությունը ընթացել է պաշտպանողական սցենարով: Ըստ դրա. • Բանակի հատուկջոկատայինները այլ ստորաբաժանումների հետ համատեղ տալիս են հակահարված և կազմակերպում լեռնանցքների պաշտպանությունը, խոցում կարևոր օբյեկտները և հակառակորդից խլում զինտեխնիկա: • Պետանվտանգության ծառայության հատուկջոկատայինները հայտնաբերում են հակառոկորդի դիվերսիոն խմբերը, լիկվիդացնում և կանխում հնարավոր սաբոտաժը: • Պետական սահմանապահ ծառայության հատուկջոկատայինները ոչնչացնում են հակառակորդի շարասյունը, իսկ սահմանապահները կազմակերպում են սահմանի անվտանգությունը (Թուրքիա, Իրան): • Ներքին զորքերի հատուկջոկատայինները կանխում են սեփական ՀՕՊ միջոցների դեմ հակառակորդի հարձակումը՝ ոչնչացնելով ուղղաթիռից իջեցված դեսանտը: • ԱԻՆ հատուկ նշանակության ուժերը կազմակերպում են չպայթած զինամթերքի լիկվիդացում, դժվարհասանելի տեղանքում սեփական ստորաբաժանումներին զենք-զինամթերքի սնուցում և վիրավորների տարհանում: Հատկանշական է, որ զորավարժություններից առաջ՝ հոկտեմբերի 29-ին, Նախիջևանում բանակում կայացել էր հատուկջոկատայիննյերի համար հետախուզական և լեռնային պատրաստության պաևապմունքների ավարտական արարողություն, որին մասնակցում էին նաև Թուրքիայից եկած զինվորականներ: Նշենք, որ զուգահեռ զորավարժություն է եղել նաև Ադրբեջանի ԶՈւ 1-ին բանակային կորպուսում: Ի տարբերություն Նախիջևանի՝ այնտեղ դրանք ընթացել են հարձակողական սցենարով: *** Ըստ Ադրբեջանի ՊՆ հաղորդագրության՝ զորավարժություններ են անցկացվել երկրի ԶՈւ բանակային միավորումներից մեկում: Զորավարժությանը ներգրավվել են զորային ավիացիա, մոտոհրաձգային ստորաբաժանումներ: Զորավարժությանը ներգրավվել են Դ-20, Դ-30 հաուբիցներ, 120 մմ տրամաչափի «Սանի» ականանետեր, ՏՕՍ-1Ա ծանր հրանետ, ԲՄՊ-2 հետևակի մարտական մեքենաներ, Տ-72 տանկեր, Մի-35 և Մի-8/17 ուղղաթիռներ: Դատելով հրապարակումից՝ զորավարժությունը ընթացել է հարձակողական սցենարով, ըստ որի՝ հրետանային պատրաստությունից հետո տանկային ստորաբաժանումները հետևակի մարտական մեքենաների հետ միասին անցնում են գրոհի՝ ճակատի երկայնքով: razm.info