Նոր սկանդալ Վլադիմիր Գասպարյանի եղբոր եւ եղբորորդու շուրջ

Նախկին ոստիկանապետ Վլադիմիր Գասպարյանի եղբոր եւ եղբորորդու շուրջ նոր սկանդալ է հասունանում։ Քննչական կոմիտեում քրեական գործ է հարուցվել հոր եւ որդու դեմ՝ առերեւույթ առանձնապես խոշոր չափի շորթում կատարելու վերաբերյալ: Նրանց դեմ հաղորդում ներկայացրած անձը ՌԴ քաղաքացի է, որը սույն հաղորդումը ներկայացրել է երկրում տեղի ունեցած ոչ բռնի հեղափոխությունից հետո: Ըստ Քննչական կոմիտեի՝ «ՌՎԳԱԶ-1» ՍՊ ընկերության փաստացի սեփականատեր հանդիսացող Ռուսաստանի Դաշնության քաղաքացուց 2014 թվականին բռնություն գործադրելու սպառնալիքով ստիպել են հրաժարվել ընկերության ավտոգազալցակայանից: Ըստ այդմ՝ 330 հազար ԱՄՆ դոլար արժողությամբ գազալցակայանը սպառնալիքով կարողացել են խլել 40 հազար ԱՄՆ դոլարով։ Բացի սրանից, Կարեն Գասպարյանի որդին՝ Սերգեյը, ընկերոջ հետ 2014թ. գարնանը ատրճանակների գործադրման սպառնալիքով, Տանձուտ գյուղի բնակչին պարտադրել են ստորագրել համապատասխան փաստաթղթեր` ավտոգազալցակայանում ունեցած բաժնեմասից հրաժարվելու վերաբերյալ, վերջինս էլ, վախի ազդեցության տակ, կատարել է նրանց պահանջը եւ հրաժարվել գազալցակայանից։ Գասպարյանի պաշտպան Արման Թամրազյանի խոսքով՝ դրա մասին իր ցուցմունքում նշել է մեկ այլ քրեական գործով տուժող ճանաչված Ավետիք Սարգսյանը (վերջինս Գասպարյանին եւ որդուն մեղադրում է Վարդավառի օրը իրեն ծեծելու եւ ստորացնելու մեջ)․ «Այդ քրեական գործի առերեսման ընթացքում տուժողի հետ առերեսման ժամանակ, երբ տուժողը չկարողացավ իր կողմից առաջ քաշած կեղծ վարկածները հրամցնել քննչական մարմինին եւ հարցերի տակ ստացվեց այնպիսի մի առերեսում, որ ասաց, թե ես լսել եմ, որ Կարեն Գասպարյանը խլել է ինչ-որ մեկի գազալցակայանը։ Ինչ-որ մեկը հիմիկվա հաղորդում տված անձն է։ Թե որտեղից է լսել, ոչ մեկս չգիտենք, հենց որ դա նա գրեց, այ դա գրելուց հետո հայտնվեց այդ մարդը, որն ասաց, որ գիտեք իմ գազալցակայանը խլվել ա Կարեն Գասպարյանի եւ նրա տղայի կողմից։ Այսինքն՝ սա հերթական շոուի շարունակությունն է, քանի որ նախկին սկսված շոուն շատ արագ ավարտվեց, չհասավ արդյունքի, խնդիր առաջացավ՝ նպատակ կա զարգացնելու։ Զարգացավ այսպես՝ նոր հաղորդում, նոր դեպք, ուռճացված երանգներով ներկայացնել։ Այդ գազալցակայանի հետ կապված ոչ Կարեն Գասպարյանն է հարցաքննվել, ոչ նրա տղան է հարցաքննվել, ոչ էլ որեւիցե ապացույց կա, որ տեղի է ունեցել շորթում։ Ողջամիտ չի, որ 330 հազար ԱՄՆ դոլար արժողությամբ գույքը ինչ-որ մեկի ճնշման տակ 40 հազար դոլարով վաճառեր։ Սա ընդամենը պղտոր ջրում ձուկ բռնելու փորձ է։ Մեր երկրում հեղափոխությունից հետո մի արատավոր երեւույթ է առաջացել, շատերը յանի թե մեր խախտված իրավունքներն ենք ուզում վերականգնել, այն իշխանությունների օրոք չէինք կարողանում։ Հիմա, եթե Կարեն Գասպարյանը Վլադիմիր Գասպարյանի եղբայրը չլիներ, ես չեմ կարծում, որ էդ փաստերով գործ կհարոցվեր։ Երբ Կարեն Գասպարյանը հարցաքննվի, կներկայացնի, թե այդ գազալցակայանը ոնց է ձեռք բերել, ի վերջո դրանք գրանցվում են, հազարավոր վկաներ կան․․․ Այդ մարդը սպասեց, որ Ավետիք Սարգսյանը իր ցուցմունքում գրի դրա մասին, որ նոր գա, ինքը գրի։ Իր դեպքը թողել էր, ասում էր՝ ես լսել եմ։ Սա սովորական սցենար է»։ Մանրամասները` hraparak.am-ում