Եթե ՀՀ-ն կորցնի ՀԱՊԿ գլխավոր քարտուղարի պաշտոնը, միակ մեղավորը Փաշինյանն է լինելու. Շարմազանով

Ջոն Բոլթոնի հայտարարության վերաբերյալ կան մտահոգություններ, որոնք այսօր ի ցույց են դնում Հայաստանի նոր իշխանությունների, մեղմ ասած, ոչ արդյունավետ արտաքին քաղաքականությունը: Այս մասին Tert.am-ի հետ զրույցում ասաց ԱԺ փոխնախագահ, այս օրերին ՀԱՊԿ ԽՎ խորհրդի և 11-րդ լիագումար նիստերի աշխատանքներին մասնակցելու նպատակով Մոսկվայում գտնվող ՀԱՊԿ ԽՎ-ում հայկական պատվիրակության պատասխանատու քարտուղար Էդուարդ Շարմազանովը՝ անդրադառնալով ԱՄՆ նախագահի ազգային անվտանգության հարցերով խորհրդական Ջոն Բոլթոնի՝ «Հայաստանը պետք է հրաժարվի միջազգային հարաբերություններում «պատմական կաղապարներից» հայտարարության վերաբերյալ ՌԴ ԱԳՆ-ի արձագանքին: «Վարչապետ Փաշինյանը շատ է սիրում խոսել հպարտ ու ինքնիշխան քաղաքականությունից, բայց այս 6 ամսվա ընթացքում միայն բարձր գոռալով նահանջ ենք արձանագրել հայ-ռուսական հարաբերություններում: Բավականին խնդրահարույց հարցեր են առաջացել՝ սկսած ՌԴ արտաքին գործերի նախարար Լավրովի հայտարարությունից մինչև ՀԱՊԿ-ի գլխավոր քարտուղարի քրեական գործով անցնել ու ՀԱՊԿ ԽՎ-ի նիստի տեղափոխումը Երևանից Մոսկվա»,-նշեց նա: Ըստ ԱԺ փոխնախագահի՝ եթե Հայաստանը կորցնի ՀԱՊԿ գլխավոր քարտուղարի պաշտոնը, ապա դրա միակ մեղավորը վարչապետի պաշտոնակատար Նիկոլ Փաշինյանն է լինելու: «Բոլթոնի հայտարարության մեջ անհաջող ձևակերպումներից ավելի մտահոգիչ է ՀՀ վարչապետի իրականության ամբողջական գիտակցման գրեթե բացակայությունը: Ուստի՝ Ռուսաստանի՝ որպես ՀՀ դաշնակցի մտահոգությունները, կարծում եմ՝ անհիմն չեն: Ասել ու ասում եմ՝ հայ-ռուսական դաշնակցային հարաբերությունների զարգացումը բխում է մեր շահերից, և մենք պետք է ամրապնդենք մեր դիրքերը ՀԱՊԿ-ում: Բայց իրականում Փաշինյանի կառավարությունն անում է հակառակը»,-եզրափակեց Էդուարդ Շարմազանովը: Հիշեցնենք, որ Ռուսաստանի Դաշնության արտգործնախարարությունն «անքաղաքավարություն» է որակել Բոլթոնի հայտարարությունները: