«Հրազդանյան մոդելը» կամ Փաշինյանի խորհրդավոր լռությունը

Նիկոլ Փաշինյանն Ազգային ժողովում մի քանի օր առաջ վարչապետի ընտրության օրվա իր ելույթի ժամանակ հայտարարեց, որ ՀՀԿ-ն բոյկոտի միջոցով տապալեց օրենսդրական փոփոխությունները, որովհետեւ մտածում են, թե  գործող Ընտրական օրենսգրքով՝ ռեյտինգային համակարգով, հնարավոր է կարողանան հասնել «ռեւանշի», որն էլ պետք է ուղիղ կապել Սյունիքի մարզկենտրոն Կապանում տեղի ունեցած քաղաքապետի ընտրությունների հետ։ «Սյունիքի գործող քրեական, քաղաքական եւ տնտեսական էլիտան, իր ձեռքում շարունակելով պահել բավականին շոշափելի լծակներ, կարողացել է կոնսոլիդացիա ապահովել եւ, ի վերջո, մարդկանց մի որոշակի հատվածի հին արժեքների եւ մշակույթի տրամաբանությամբ կամ, ավելի ճիշտ՝ հին մոդելների մոդիֆիկացված ձեւերով նրանց ուղղորդել որոշակի քվեարկության՝ ի վերջո հասնելով իրենց համար ցանկալի արդյունքի»,- հայտարարեց Փաշինյանը։ Նա համոզմունք հայտնեց, որ  գալիք արտահերթ ընտրություններում ՀՀԿ-ի հույսը «կապանյան մոդելի» գործարկումն է։ Ասել է, թե՝ Փաշինյանը Կապանի ընտրությունների արդյունքները համարում է ընտրողների ուղղորդված լինելու հետեւանք՝ արձանագրելով, որ Կապանում հեղափոխությունն է հաղթել։ Մինչդեռ  ընտրությունների հաջորդ օրը  նա հայտարարել էր, որ Կապանի քաղաքապետի ընտրությունն արձանագրեց «ժողովրդավարության հաղթանակը»։ Այսինքն՝ ժողովուրդն ինքը որոշեց, թե ով է իր նախընտրելի թեկնածուն եւ վերջին տարիներին սա բացառիկ դեպք է, երբ իշխանության թեկնածուն է: Ընդհանրապես ՔՊ թիմը առաջ էր տանում այն թեզը, թե Կապանն ապացուցեց, որ հեղափոխությունը հաղթանակել է, քանզի ստեղծվել են ժողովրդավարական պայմաններ, որտեղ ազատ մրցակցություն է ընթանում: Հիշեցնենք, որ Կապանում անկուսակցական Գեւորգ Փարսյանը հաղթել է ՔՊ թեկնածու Նարեկ Բաբայանին: Եւ վերջին օրերի նրա հարցազրույցներից պարզ է դառնում, որ նա տեղի միջի ձեռնարկատերերից մեկի որդին է ու առանձնապես ոչ այնքան հայտնի անձնավորություն: Պարզապես հոր գործոնի շնորհիվ նա ընտրվել է քաղաքապետ, ինչը ցավագին է ընդունվել գործող իշխանության կողմից: Եթե ընդունենք, որ Փարսյանի հաղթանակը քրեական եւ այլ էլիտայի գործոնով է պայմանավորված, ապա հարց է ծագում՝ իսկ ինչու են մինչ օրս գործում այդպիսի էլիտաներ, չէ որ Փաշինյանը վստահեցնում է, որ Հայաստանում այլեւս օլիգարխ չկա, կոռուպցիա չկա, հապա ինչու կան նման էլիտաներ: Խնդիրն այն է, որ Փաշինյանը շարունակում է շարժվել՝ ով մեզ հետ չէ դավաճան է, կամ պոլի փետ լինի, մեզանից լինի ավանդական լոզունգներով: Փաշինյանին թվում է, թե ողջ հանրապետությունում ՔՊ-ականերից լավը չկա, կամ բոլորն նրանք, ովքեր ուզում են լավը լինել, պետք է անդամագրվեն իրենց կուսակցությանը: Եթե խնդիրը ոչ թե  Կապանի նորընտիր քաղաքապետի անձի մեջ է, այլ՝ ուղղորդումների, այդ դեպքում ինչո՞ւ նմանատիպ անդրադարձ չկա Հրազդանի քաղաքապետի ընտրություններին, եւ ինչո՞ւ Նիկոլ Փաշինյանը չի հայտարարում, որ Հրազդանում հակահեղափոխությունն է հաղթել: Այստեղ էլ ՔՊ-ն թեկնածու չէր առաջադրել ու ձեւացնում էր, թե չի խրախուսում, որ առաջադվել է Սասուն Միքայելյանի որդին, այսինքն նոր Հայաստանում էլ կա Մանվել Գրիգորյան ի դեմս ՔՊ վարչության նախագահ Սասուն Միքայելյանի, ով որդուն դարձրեց Հրազդանի քաղաքապետ եւ այդ ճանապարհին մաքրեց բոլոր մրցակիցնրին, այս մասին մամուլում բազմաթիվ հրապարակումներ եղան: Եւ մի՞թե սա ուղղորդում չէր, եթե կուզեք քրեական, տնտեսական էլիտայի կողմից, եթե Կապանի թեկնածուն անկուսակցական էր եւ որեւէ կլանի չի հարում, ապա Սասուն Միքայելյանը բազում թելերով եւ նոր, եւ նախկին իշխանության հետ է կաված: Ինչու Փաշինյանը չի հայտարարում, որ այստեղ էլ ուղղորդված ընտրություններ են եղել, հատկապես, որ Միքայելյանի որդու մրցակիցը բավական պարկեշտ եւ գրագետ թեկնածու է: Թե երկրում մոլեգնում է համատարած ատելության, մերժողականության մթնոլորտ, որտեղ այլեւս բարիկադներ քանդելն անհնար է: Անի Սահակյան