Բժշկականի դեպքը սադրանք էր,պատճառն էլ հայտնի է. Արսեն Թորոսյան

«Բժշկականում տեղի ունեցած միջադեպը ճանճը փիղ սարքելու մի լավ օպերացիա էր:Նուբարաշենի հոգեբուժարանի «անբասիր կենսագրության և վարքով» նախկին տնօրենների շնորհիվ, օրինակ, նույն Արմեն Մուրադյանի ղեկավարման տարիներին, 4 անգամ բարձր գնով քաղցրավենիք է գնվել, տասնյակ միլիոնների ջուր է գողացվել հարևան հիմնարկների կողմից, 40 հեռախոս են գնել, որ մեկ «Այֆոն» վերցնեն… Այս ամենը, Թորոսյանի հավաստմամբ, տեղի է ունեցել նախկին տնօրենի օրոք և վնասնայժմ վերականգնվում է: Նման միջադեպեր բժշկականում օրական 10 հատ լինում է, ոչ մեկը նման արձագանք չի ստանում: Եղածը կոնկրետ սադրանք էր իմ անձի դեմ: Այժմ Նուբարաշենքի հոգեբուժարանում առաջին անգամ վերանորոգման աշխատանքներ են տարվում և էլի մի շարք բաներ են արվում, որոնք նախկինում չեն արվել: Այսինքն՝ ինչ-որ բան ասելուց պետք է նաև անցյալը նայեն: Օրինակ, հիմնարկն ուներ 82 մլն դրամ պարտ, որի 50 մլնն արդեն փակվել է»,-լրագրողների հետ հանդիպման ժամանակ, նման կարծիք հայտնեց ՀՀ առողջապահության նախարար Արսեն Թորոսյանն՝ անդրադառնալով «Հոգեկան առողջության պահպանման ազգային կենտրոն» ՓԲԸ-ի տնօրեն Նարեկ Վանեսյանի պահվածքի ու դրան հաջորդած բաց նամակի պատմությանը: Ըստ նախարարի՝ ինչ վերաբերում է «շոուին» , ապա այդ բաց նամակի ստորագրողների մի մասին կանչել և ստորագրել են տվել, իսկ մի մասն ուղղակի հրաժարվել է: Ավելին, Թորոսյանի հավաստմամբ, վարչապետին ուղղված բաց նամակը ստորագրողների մեջ կան մարդիկ, որոնք այդ պահին Հայաստանում չեն եղել և մինչ օրս էլ երկրում չեն: «Կարծում եմ՝ կազմակերպված էր այդ ամենը ու ուղղված էր իմ դեմ: Խնդիրն այն է, որ մենք հիմա փորձում ենք բժշկականի վրա որոշակի վերահսկողություն սահմանել՝ բուհի խորհրդի կազմում մեր ներկայացուցիչներն ունենալու ձևով, ինչպես նաև բուհի տված կադրերի մասնագիտական ունակությունների վրա հսկողություն իրականացնելու համար: Մենք քայլեր ենք ձեռնարկելու, որպեսզի բժշկականի ավարտական քննություններից սկսած մինչև արդինատուրայի ավարտը լինի նախարարության հսկողության տակ:Այդ միջադեպն այն միջադեպը չէր, որ երկրի վարչապետին դիմեն ու օգտվելով այն հանգամանքից, որ ինքը երկրում չէ՝ նման աղմուկ բարձրացնեին: Մարդկանց կանչել ու ստորագրել են տվել բաց նամակի տակ»,-ասաց Թորոսյանը: Հարցին, թե ո՞ւմ կողմից են «ստորագրել տվել», արդյո՞ք բուհի ռեկտոր Արմեն Մուրադյանին նկատի ունի նախարարը, վերջինս պատասխանեց, թե՝ այո, նաև: