Նիկոլ Փաշինյանն ամուր գրկեց Սերժ Սարգսյանին

Վարչապետի ժամանակավոր պաշտոնակատար Նիկոլ Փաշինյանը ԱԺ հատուկ նիստում մի ոչ անկեղծ հայտարարություն արեց՝ ասելով, թե իր թիմը խնդիր չի տեսնում արտահերթ ընտրություններին գնալ գործող ընտրական օրենսգրքով, որի անկյունաքարային դրույթը՝ ռեյտինգային ընտրակարգն է։ Նա ասաց՝ հակառակը, այդ ընտրակարգը ՀՀԿ-ին ճանապարհ չի տալիս․ «Հարգելի Հանրապետականներ, ձեզ անընդհատ սխալ ուղղությամբ են տանում, որովհետև հին Ընտրական օրենսգիրքը պահելով՝ դուք մեզ մեծ ծառայություն եք մատուցում: Մենք ուզում ենք Ընտրական օրենսգիրքը փոխել, որպեսզի ընտրական պրոցեսը հնարավորինս քաղաքական բանավեճի տրամաբանության մեջ դնենք»,- ասաց նա: Փաշինյանը հայտարարեց, որ Սերժ Սարգսյանի համար գրված Սահմանադրությամբ հնարավոր է եղել հասնել նրա հրաժարականին և նույն տրամաբանությամբ ՀՀԿ-ի համար գրված օրենքներով հնարավոր կլինի ընտրություններում հաղթել ՀՀԿ-ին: «Սև ու սպիտակի տրամաբանության մեջ դուք զրո ձայն եք ստանալու: Ձեր միակ շանսը փոփոխված Ընտրական օրենսգիրքն է»,- նշեց նա եզրափակելով․«Գոնե ընդդիմություն մնալու շանսը պահպանե՛ք` հին ընտրական օրենսգրքով, դուք ընդհանրապես չեք անցնելու»։ Այո, չի բացառվում Փաշինյանն ակնարկում է, որ ՀՀԿ-ի ռեյտինգային թեկնածուներից շատերը կհայտնվեն ՔՊ ռեյտինգային ցուցակներում եւ ինքը թույլ չի տա որեւէ գործարարի աշխատել հանուն ՀՀԿ-ի։ Բայց ինչպես ժողովրդական առածն է ասում՝ «ուղտն ինչքան էլ սատկած լինի` էլի կաշին մի իշաբեռ է» ։ ՀՀԿ-ն իր տասնամյա իշխանության ընթացքում անկասկած համայնքերում ունի այնպիսի կուսակցական ներկայացուցիչների, համակիրների, որոնք իրենց համայնքի բնակիչների համար այսպես կոչված «շտաբօգնություն» են ծառայել։ Ու անկախ քաղաքական նոր իրավիճակից, համայնքում մարդկային հարաբերությունները կխոչընդոտեն զուտ քաղաքական ընտրություն կայացնել։ Այս առումով մեծ է ոչ միայն ՀՀԿ-ի, այլեւ ռեսուրսակիր երկրորդ ուժի՝ ԲՀԿ-ի շանսերը։ Ընդհանրապես քաղաքագիտական տեսանկյունից Փաշինյանին ավելի շատ ձեռնտու է ընտրությունների գնալ հին օերնսգրքով, որն ավելի կլեգիտիմացնի իր իշխանությունը։ Այդ պարագայում ՀՀԿ-ն եւ այլ ուժեր նրան չեն մեղադրի քաղաքական մենաշնորհ հաստատելու մեջ եւ խորհրդարանում ի դեմս ՀՀԿ-ի եւ ԲՀԿ-ի կձեւավորվի հաստատուն ընդդիմություն։ Իսկ այդ պարագայում Նիկոլ Փաշինյանը մշտապես կբանեցնի սեւերի ու սպիտակների իր հայտնի լոզունգը, կհայտարարի,կխորացնի առաջացած անջրպետը ու էլ ավելի կամրապնդի իր իշխանությունը։ Իսկ նրանց այլընտրանքը Լույս դաշինքն ու Սասնա ծռեր կուսակցությունն են։ «Լույսի» ընդդիմություն դառնալու պարագայում մեծ է հավանականությունը, որ ինչ որ պահից այդ ուժը հիմնովին դուրս կգա Փաշինյանի ազդեցության տակից , կսկսի ինքնուրույն գործել եւ քանի որ ՀՀԿ-ի ու ԲՀԿ-ի պես վարկաբեկված մութ անցյալ չունի, կարող է իշխանական հայտ ներկայացնել՝ եւ ինչու ոչ նույն իշխանությունը տրոհելու ճանապարհով հասնել իշխանափոխության։ Սասնա ծռերի դիրքերի ամրապնդումն նույնպես բոլորովին ձեռնտու չէ Նիկոլ Փաշինյանին։ Արմատական դիքերից հանդես եկող այս ուժը ցանկացած հարցում կարող է գլխացավանք դառնալ ապագա իշխանությունների համար, հատկապես, որ բազմիցս են հայտարարել, թե ապստապբության իրավունքը հարկ եղած դեպքում պետք է իրագործել։ Անի Սահակյան