«Ինչո՞ւ ես պանիկյորություն անում, կեսգիշերով գնում խորհրդարան». Պարույր Հայրիկյանը` Փաշինյանին

ԱԻՆ նախագահ Պարույր Հայրիկյանի համոզմամբ, եթե ուզում ենք քաղաքացուն երկրի տերը դարձնել, պիտի գնալ Սահմանադրությունը փոխելու ճանապարհով, ոչ թե վերացական ճանապարհով, այլ փոփոխությունը կատարելը միշտ հաշվի առնելով մեկ սկզբունք՝ քաղաքացիների իրավունքներն ավելանո՞ւմ են, թե պակասում. «Եթե այսօր որոշ դեղնակտուցներ ասում են, թե տարբեր տեսակետները պիտի համադրենք, դա անցած փուլ է: Միայն մի բանն է կարևոր՝ այս փոփոխություններով քաղաքացիների իրավունքներն ավելանո՞ւմ են, թե՞ պակասում: Ռեյտինգայինից հրաժարվելը նվազեցնում է քաղաքացիների դերակատարությունը, ուրեմն սկզբունքորեն սխալ է»: Ըստ նրա՝ տեղին չէ վարչապետի՝ խուճապի մատնվելը. «Վարչապետ ես, դու ծրագիր ես ընդունել, որ մեկ տարվա ընթացքում պիտի տեղի ունենան ընտրություններ, ինչո՞ւ ես խուճապի մատնվում: Էհ, ինչ, ինչի՞ համար է պանիկյորությունը, որ կեսգիշերով վազում ես պառլամենտ, ի՞նչ է պատահել: Խորհրդարանը նրա համար է, որ ինքնուրույն որոշում ընդունի: Դու էլ վարչապետ ես նրա համար, որ դրան այո, կամ ոչ ասես»: Պարույր Հայրիկյանը Նիկոլ Փաշինյանին հորդորում է որպես վարչապետ շարժվել իր լծակներով. «Վարչապետ ես ընտրվել, քո լծակներով գործիր, առանց խուճապի, խուճապը շատ ենթակայական երևույթ է և իրավիճակի հետ կապված չէ: Քո խմբակցությունը քո թեկնածությունն է առաջադրում, որ մերժվի: Էհ, ընդհանրապես մի առաջադրեք: Տուն-տունիկ. մանկապարտեզում երևի վատ դաստիարակներ են ունեցել, երեխաներին տրվող ամեն բան չեն տվել նրանց, ուզում են չափահաս տարիքում ստանալ: Երկիրը մանկապարտեզի վերածելն անընդունելի է»: