Նիկոլ Փաշինյանին հայտնի է դարձել ՀՀԿ-ի պայմանավորվածությունը

ՀՀԿ-ն մեծամասնություն չի, բայց իմ ունեցած տեղեկություններով իրենք իրենց նախկին գործընկերների հետ աշխատել են, որ Ընտրական օրենսգրքի փոփոխությունների քննարկման ժամանակ չգան քվեարկության: Այս մասին, այսօր՝ հոկտեմբերի 24-ին, ԱԺ-ում լրագրողների հետ զրույցում նշեց վարչապետի պաշտոնակատար Նիկոլ Փաշինյանը՝ անդրադրադառնալով դիտարկմանը, որ ՀՀԿ-ականներն ասում են, որ իշխանությունը խորհրդարանում ուներ այնքան պատգամավոների աջակցություն, որ անցկացներ Ընտրական օրենսգրքի փոփոխությունը: Դիտակմանը, թե գործարար պատգամավորների վրա կառավարության կողմից ճնշումներ գործադրելու մասին տեղեկություններ կան, Փաշինյանը պատասխանեց, որ ճնշումներ չկան, եղել է պայմանավորվածություն, որ պետք է այս ընթացքում խնդիրները լուծեն, մարդիկ իրենց պայմանավորվածության համաձայն եկել են: Մի մասն էլ, չնայած պայմանավորվածությանը, չեն եկել քվեարկելու: «Ես անկեղծ եմ ասում՝ գործող Ընտրական օրենսգրքով ընտրությունների գնալը ձեռնտու է միայն իշխանություններին, այսինքն՝ միայն մեզ: Այնպես չլինի, որ մենք հիմա ուզում ենք ընտրական օրենսգիրք փոխենք և այլն: Մենք խնդիր չունենք, էն հին համակարգը չի լինելու, էն մարդիկ, ովքեր իրենց ձայն էին բերելու, չեն առաջադրվելու, որովհետև այդ մարդիկ հազիվ ազատագրվել են: Ես, օրինակ, վարչապետ ընտրվելուց հետո մի քանի հոգու հրավիրել եմ և ասել եմ՝ հլա մի հատ բացատրեք, ձեր ինչի՞ն է պետք, որ դուք պատգամավորի թեկնածու առաջադրվեք, էդքան փող ծախսեք, էդքան նեգատիվ ձեր վրա կենտրոնանա: Եվ մի քանի հոգի շատ անկեղծ ասել են՝ մեր ինչի՞ն ա պետք, մեզ կանչել են, ասել են՝ էսքան ձայն պիտի ապահովեք, գնացեք առաջադրվեք, էսքան էլ փող կծախսեք, ոնց ուզում եք, էդ ձայները ապահովեք: Հիմա էդ նույն մարդկանց ոչ մեկ չի ասելու՝ գնացեք առաջադրվեք, ձայն ապահովեք, ո՞ւմ հաշվին են նրանք ձայն ապահովելու»,- նշեց Փաշինյանը: