Արսեն Քարամյան. Ինձ համար շոկային էր «Վերածնունդ» ծրագրի վերաբերյալ որոշումը

«Վերածնունդ» երիտասարդական ավան կառուցելու ծրագրի շահառու երիտասարդ մասնագետները հիմա մի նամակ են պատրաստում՝ ուղղված վարչապետի պաշտոնակատար Նիկոլ Փաշինյանին։ Panorama.am-ի հետ զրույցում շահառուներից մեկը, ով փոփոխությունների հետևանքով այդ ծրագրի շրջանակում հնարավոր է բնակարան չունենա, ասաց, պատրաստվում են խնդրի մասին մանրամասն իրազեկել Փաշինյանին՝ ակնկալիքով, որ նա  ինչ-որ կերպ լուծում կտա։ Հիշեցնենք, որ  «Մատչելի բնակարան՝ երիտասարդ մասնագետներին» ծրագրի պայմանները փոխվել են: Որոշվել է՝  Երևան քաղաքի Մոնթե Մելքոնյան 44 հասցեում կառուցվող «Վերածնունդ» երիտասարդական ավանի բնակարանների շահառուներին հիփոթեքային վարկեր հնարավոր է տրամադրել միայն «Երիտասարդ ընտանիքին` մատչելի բնակարան» պետական նպատակային ծրագրի շրջանակում։ Նոր որոշման հետևանքով, շահառուների մի մասը դուրս է մղվում ծրագրից, քանի որ չի համապատասխանում նոր պայմաններին։ Կառավարության ղեկավարի պաշտոնակատարից լրագրողները երեկ հետաքրքրվել էին՝ ինչո՞ւ են փոխվել պայմանները, ապա նկատել՝ անարդար  բան է եղել։ «Վրդովվելու անհրաժեշտություն չկա, եթե անարդար է, կնայենք, կշտկենք, կուղղենք»,-ասել էր Փաշինյանը։ «ԵՊՀ շրջանավարտների միավորման» նախագահ Արսեն Քարամյանից Panorama.am-ը փորձեց պարզել, թե ինչու է նման որոշում կայացվել, շահառուների ո˚ր մասն է զգալու որոշման հետևանքները։ ՀԿ նախագահն ասաց՝ այդ որոշումն իր համար անսպասելի էր ու շոկային։ «Միայն ինձ համար չէ, որ  անսպասելի որոշում էր։ Սա ուղղակի շոկային էր։ Կարծում եմ, որ ինչ-որ պատճառ է եղել նման որոշում ընդունելու համար։ Եթե որոշում է կայացվել, պետք է հստակորեն ցույց տրվի, թե որն է եղել այդ որոշման պատճառը։ Գուցե այնքան օբյեկտիվ պատճառ է, որ որևէ մեկը բարոյական ու այլ առումներով որևէ բան ասելու իրավունք չունի»,-ասաց նա։ Ա. Քարամյանի հաշվարկով, փոփոխությունը կշոշափի շահառուների 30-40 տոկոսի շահերը։ Հետաքրքրվեցինք, Փաշինյանի հայտարարությունից հետո  որևէ փոփոխության հնարավորություն կա՞։ «Ես անկեղծորեն ուզում եմ հավատալ, որ պարոն Փաշինյանը խնդրի մեջ ձեռնամուխ կլինի։ Մենք ընդհանուր հայրենիք ունենք, մեր երիտասարդներն են, իմ ու քո չկա, այսպես ասած։ Վստահ եմ, որ լուծումը կլինի համենայն դեպս այնպիսին, որ մարդկանց կբավարարի»,-ասաց Քարամյանը։ Հարցին՝ արդյո՞ք ծրագիրն իրականացնող ՀԿ-ն փորձել է կառավարությունից ճշտել նման որոշման պատճառը, Քարամյանը պատասխանեց, վերաֆինանսավորման ու դրամավարկային քաղաքականությունը վարում է ԿԲ-ն, հարցն այնքան էլ կառավարության խնդիր չէ, կառավարությունը կարող է հորդորել կամ առաջարկել որևէ այլ լուծում գտնելու համար։ «Այո, մենք հույս ունենք, որ վարչապետն իր բազմազբաղ առօրյայից ժամանակ կհատկացնի որոշակի ուղղորդումներ կամ առաջարկնել ներկայացնելու համար։ Սպասում ենք, հույս ունենք, պատրաստ ենք քննարկումների մեր բոլոր գործընկերների հետ։ Ես վստահ ասում եմ՝ որևէ քաղաքական խնդիր չկա, ֆինանսատնտեսական ինչ-որ խնդիրներ կարող են լինել, բայց վստահ եմ, որ ցանկացած խնդիր ունի լուծում, եթե ոչ 100 տոկոսանոց, ապա գոնե միջանկյալ, որը բոլոր կողմերին էլ կգոհացնի, կբավարարի»,-նշեց նա։ Հիշեցնենք,  որ ծրագրի շրջանակում նախատեսվում է Երևան քաղաքի Մոնթե Մելքոնյանի փողոցին հարակից 6.57 հա մակերեսով հողամասում (Դալմայի այգիներում) կառուցել ժամանակակից ճարտարապետական լուծումներով «Վերածնունդ» երիտասարդական ավանը: Նախատեսված էր, որ երիտասարդական ավանում, ընդհանուր առմամբ կկառուցվեն մոտ 1170 բնակարաններ, ստորգետնյա ավտոկայանատեղեր, հասարակական նշանակության տարածքներ (խանութներ, կենցաղ-սպասարկման օբյեկտներ): Ավանն ունենալու է ժամանակակից արտաքին լուսավորություն, ամբողջությամբ բարեկարգված տարածք, ստեղծվելու են նոր կոմունիկացիոն համակարգեր, կառուցվելու են մանկական խաղահրապարակներ, մինի ֆուտբոլի դաշտ և կանաչապատ հանգստի գոտիներ: