Էրդողանը մանրամասներ է պատմել սաուդցի լրագրողի սպանությունից
Թուրքիայի նախագահ Ռեջեփ Թայիփ Էրդողանը հայտարարել է, որ Ստամբուլում Սաուդյան Արաբիայի հյուպատոսարանի շենքում սաուդցի ընդդիմադիր լրագրող Ջամալ Խաշուկջիի սպանությունը նախապես պլանավորված է եղել, հաղորդում է BBC-ի թուրքական ծառայությունը:Թուրքիայի նախագահը նաև նշել է, որ սպանության գործում ներգրավված է եղել Սաուդյան Արաբիայի 18 քաղաքացի, որոնց թվում կա նաև գեներալ, նրանք բաժանված են եղել երկու տարբեր խմբի, որոնցից առաջինը՝ 3 հոգանոց, Ստամբուլ է ժամանել սպանության նախօրեին, իսկ երկրորդ խումբը, որը բաղկացած է եղել 15 հոգուց, Թուրքիա է եկել հենց սպանության օրը: «Սպանության օրն այդ մարդիկ ինչո՞ւ են Ստամբուլում հավաքվել, ումի՞ց են հրաման ստացել, ո՞ւր է մարդու մարմինը, ում սպանությունը պաշտոնապես ընդունել են: Ոչ ոքի մտքով անգամ թող չանցնի, թե գործը կփակվի առանց այս բոլոր հարցերի պատասխանը ստանալու», - հայտարարել է Էրդողանը: Սաուդյան Արաբիան շաբաթներ շարունակ հավաստիացրել է, որ տեղեկություն չունի լրագրողի ճակատագրի մասին, բայց օրերս Էր-Ռիյադը խոստովանել է, որ լրագրողը սպանվել է հյուպատոսարանում տեղի ունեցած ձեռնամարտի ընթացքում: Սաուդյան Արաբիայի պաշտոնյաները պնդում են, թե լրագրողը սպանվել է, երբ հյուպատոսարանում միջադեպը «դարձել է անվերահսկելի»: Էրդողանը հայտարարել է, թե Սաուդյան Արաբիան պարտավոր է բացահայտել լրագրողի սպանությանը առնչություն ունեցող բոլոր մարդկանց՝ անկախ նրանց զբաղեցրած պաշտոններից, և պնդել է, որ մեղադրյալների դատավարությունը պետք է տեղի ունենա Ստամբուլում:
Հետևեք մեզ Viber-ում
