Ընտրություններում հաղթանակ ենք ակնկալում. Նիկոլ Փաշինյան
««Քաղաքացիական պայմանագիր» կուսակցությունն ակնկալում է, որ առաջիկա խորհրդարանական արտահերթ ընտրություններում հաղթանակ կտանի: Հիմա շուտ է ակնկալվող թվերի մասին խոսելը, սակայն դա չի նշանակում, որ մենք հայտ չենք ներկայացնելու: Մենք ակնկալում ենք, որ խորհրդարանական ընտրություններում հաղթանակ կտանենք, ժողովուրդը վստահության քվեն մեզ կտա: Միևնույն ժամանակ, ուզում եմ ընդգծել, որ մեր խնդիրը չի եղել եւ չի լինելու իշխանությունը պահելը: Մենք Հայաստանում իշխանություն չունենք, Հայաստանում իշխանությունը պատկանում է ժողովրդին»,- «Եվրասիական շաբաթ» միջազգային ֆորումին լրագրողների հետ ճեպազրույցում ասաց ՀՀ վարչապետի պաշտոնակատար Նիկոլ Փաշինյանը: « Ընտրական օրենսգրքի փոփոխությունները պարզեցման ուղղությամբ են, ապա այստեղ ժամանակի խնդիր չկա: Մեր գործող Ընտրական օրենսգիրքն ընդունվեց ընթացակարգերի էական բարդացմամբ, ժամանակ էր պետք, որ մարդիկ դրանք ընկալեն, ըմբռնեն: Նույնիսկ այդ պարագայում ընտրությունների ժամանակ որոշ հարցեր էին առաջանում: Այս պարագայում ամեն ինչ գնում է պարզեցման ուղղությամբ, չեմ կարծում, որ այդ քննադատությունները արտահայտում են իրականությունը»,- անդրադառնալով Ընտրական օրենսգրքի փոփոխությունների շուրջ հնչող քննադատություններին, փոփոխությունները կարճ ժամկետում իրականացնելուն՝ նշեց Նիկոլ Փաշինյանը: Փաշինյանը չի բացառում, որ նախկին իշխանավորներից, բարձրաստիճան պաշտոնյաներից ոմանք առաջիկա խորհրդարանական ընտրություններում համալրեն «Քաղաքացիական պայմանագիր» կուսակցության ցուցակը: «Ցուցակում հնարավոր է լինեն մարդիկ, ովքեր առնչվել են «Հանրապետական» կուսակցության հետ։ Հիմա, օրինակ, Ֆելիքս Ցոլակյանը նախարար է նշանակվել։ Իսկապես, խնդիր ունենք համախմբում իրականացնել, եւ փորձ անել պրոֆեսիոնալ մարդկանց առաջ ճանապարհը չփակել։ Ինչպե՞ս է Սերժ Սարգսյանը երկար տարիներ պահպանել իշխանությունը, եթե այդ կառուցվածքը նայենք, կտեսնենք, որ հիմնականում պրոֆեսիոնալներին ներգրավելով»,- ասաց Նիկոլ Փաշինյանը:
Հետևեք մեզ Viber-ում
