Պուտինի նոր պատժամիջոցներն ու Հայաստանի հակվածությունը դեպի Մոսկվա

Եվրոպական Միության ղեկավարները Բրյուսելում գումարած ժողովում կոչ են արել Մոսկվայի նկատմամբ սահմանել նոր պատժամիջոցներ՝ ի պատասխան միության անդամ երկրներին հաքերային գրոհների ենթարկելու ռուսների գործելակերպին: Մեծ Բրիտանիան և Նիդերլանդները շաբաթներ առաջ ներկայացրել են տեղեկություններ, որոնց համաձայն, Ռուսաստանի զինված ուժերի գլխավոր վարչության՝ ГРУ-ի գործակալներն, այս տարվա ապրիլին փորձել են կոտրել Հաագայում տեղակայված քիմիական զենքի արգելման միջազգային կազմակերպության կայքէջը: Եվրամիության նախաձեռնության մասին տեղեկությունը հրապարակվել է անդամ պետությունների ղեկավարներից կազմված Եվրոպական խորհրդի պաշտոնական էջում: Եվրամիությունը նշում է, որ անհրաժեշտ է ձեռնարկել միջոցներ՝ հաքերային գրոհներին հակազդելու և դրանք արդյունավետ եղանակով կանխելու համար: Առաջարկը ներկայացրել են Մեծ Բրիտանիան, Նիդերլանդները, Լիտվան, Էստոնիան, Լատվիան, Դանիան, Ֆինլանդիան և Ռումինիան: «Ազատության» թղթակից Ռիկարդ Ջոզվյակի փոխանցմամբ, այդ առաջարկն անմիջապես ուժի մեջ չի մտնում: Առաջիկա շաբաթներին և ամիսներին Եվրամիության երկրները դեռ պետք է մշակեն օրինագիծը և կազմեն իրավական պարզաբանումներ պարունակող դրա վերջնական տարբերակը: Մեծ Բրիտանիայի վարչապետ Թերեզա Մեյը գործընկերներին կոչ է անում այս հարցում միասնական լինել և համատեղ քայլերով պատասխանել հաքերային հարձակումներին՝ նշելով, որ այլապես մեծ վտանգներ են սպառնում Եվրամիության տնտեսությանը և դեմոկրատիային: «Անհրաժեշտ է սահմանափակող որոշումներով, այդ թվում՝ կոշտ պատժամիջոցներով արձագանքել և պատժել կիբեր-գրոհայիններին», - ասում է Բրիտանիայի վարչապետը: Նախագծով առաջարկվում է սառեցնել հաքերային գրոհների համար պատասխանատվություն կրող մարդկանց հաշվեհամարները և արգելել նրանց մուտքը Եվրամիության տարածք: Այդ նախաձեռնությունը Եվրամիության անդամ երկրները ներկայացնում են մի ժամանակաշրջանում, երբ Արևմուտքի և Ռուսաստանի հարաբերություններում առկա է լուրջ ճգնաժամ, որն ի հայտ է եկել ռուսներին վերագրվող հաքերային գրոհների և ընտրություններին միջամտելու հետևանքով: Միաժամանակ արևմտյան փորձագետներն արձանագրում են, որ հետխորհրդային տարածաշրջանում Ռուսաստանի ազդեցությունը մեծանում է ԱՄՆ-ի թուլության պատճառով: The Hill կայքի փոխանցմամբ՝ Միացյալ Նահանգները պետք է ավելի ակտիվորեն համագործակցեն համաշխարհային հանրության հետ, քանի դեռ ռուսերենը չի դարձել գերիշխող և փոխարինել անգլերենին առևտրի ոլորտում: Հոդվածագրի կարծիքով՝ ԱՄՆ-ի ցածր ազդեցության պատճառով հետխորհրդային երկրները ավելի հաճախ են դիմում Կրեմլին։ Օրինակ՝ Սիրիայում Ռուսաստանի հաջողությունը հանգեցրեց նրան, որ այժմ Թուրքիան գնում է ռուսական C-400 հակահրթիռային համակարգեր: Չնայած ԱՄՆ պատժամիջոցների սպառնալիքին՝ Հնդկաստանը նույնպես պատրաստ է 5 մլրդ դոլարով ձեռք բերել ռուսական սպառազինության համակարգեր: Հոդվածագիրը նաև նշում է, որ Հայաստանում ընդդիմադիր առաջնորդ Նիկոլ Փաշինյանի՝ իշխանության գալուց հետո հույս կար, որ այդ երկիրը պատրաստ է շրջվել դեպի ժողովրդավարական Արևմուտքը, սակայն Հայաստանի հակվածությունը դեպի Ռուսաստան դեռևս շարունակվում է։ Պուտինի հետ հանդիպման ժամանակ Փաշինյանը վստահեցրեց, որ հայ-ռուսական հարաբերությունները ռազմավարական-գործընկերային բնույթ են կրում։ Չնայած ռուս-վրացական հարաբերություններում առկա խնդիրներին՝ երկու երկրների պաշտոնյաները պարբերաբար բանակցություններ են վարում և վերականգնում տնտեսական կապերը: Բացի այդ, Մոլդովան նույնպես փորձում է բարելավել հարաբերությունները Ռուսաստանի հետ, և նախագահ Իգոր Դոդոնը կողմ է Մոսկվայի հետ սերտ հարաբերությունների ամրապնդմանը: Մետաքսյա Շալունց