Կեղտոտ փողերի վերջաբանը. Յուվեցի Կարոյի սպանության հետքերով

Կիրակին արյունալի էր նախկին ԲՀԿ-ական պատգամավորներ Յուվեցի Կարո մականունով հայտնի Կարո Կարապետյանի եւ Հարություն Ղարագյոզյանի՝ Կարամելի Հարութի համար: Հայտնի դարձավ, որ վերջինը Նորք Մարաշի ռեստորաններից մեկում սպանել է Յուվեցուն, մի քանի ժամ էլ չէր անցել, երբ Զովունիի արտադրամասերից մեկի տարածքում հայտնաբերվեց Կարամելի Հարութի դին՝ հրազենային վնասվածքով: Տեղեկությունների համաձայն պատգամավորները պարտք-պահանջը լուծել են այս ճանապարհով: Դեռեւս հայտնի չէ, թե ով էր պարտատերը՝ Կարապետյանը, թե Ղարագյոզյանը, սակայն Կարո Կարապետյանը վերջին տարիներին հաճախ է հայտնվել այդպիսի պատմությունների կիզակետում: Մի քանի տարի է՝ մամուլը գրում է, որ Յուվեցի Կարոյի ընտանիքին պատկանող Քաղցրաշենի գինու գործարանը գնել է մեծ քանակությամբ խաղող, և այդ գումարները Յուվեցին հրաժարվում է վճարել: Այս պատմությունը շարունակվում է մինչ օրս: Վերջին տարիներին քաղցրաշենցիները մի քանի անգամ փակել են Երևան-Մեղրի միջպետական ճանապարհը, բողոքի ցույցեր կազմակերպել կառավարության շենքի դիմաց, պահանջելով իրենց գումարները, սակայն բազում խարդախություններում թրծված Կարապետյանը պնդում էր, թե գործարանը արենդայով է տվել, ինքը պարտք-պահանջ չունի որեւէ մեկի հետ: Նրա հայրենի Յուվա համայնքում էլ խոսակցություններ էին շրջանառվում, թե Յուվեցի Կարոն վարձակալության է տվել այդ գործարանը ինչ-որ գործարարի, հետագայում իր ոճին հարազատ մնալով՝ քցել է և՛ գործարարին, և՛ գյուղացիներին: Հիմա այդ վարձակալը փորձում է փակել գյուղացիներին պարտք գումարները, որ խուսափի քրեական պատժից: 2015-ին էլ ձերբակալվեց Կարապետյանի կուսակից նախկին պատգամավոր Գոհար Ենոքյանը: Նախկին պատգամավորին ձերբակալել էին ԲՀԿ-ական Կարո Կարապետյանի սպանության նախապատրաստությանը մասնակցելու կասկածանքով: Հետո պարզվեց, որ վեճը եղել է 6 միլիոն դոլարի շուրջ, որը, ըստ մամուլի հրապարակումների, հենց նախկին ԲՀԿ-ական պատգամավոր Կարո Կարապետյանի գումարն է եղել: Արայիկ Ենոքյանը՝ Գոհար Ենոքյանի հոգեզավակը, խարդախության գործով հինգ տարի նստել էր, 2013 թվականին համաներմամբ ազատ արձակվել, ամիսներ անց արդեն մեղադրվել է Կարապետյանի սպանությունը նախապատրաստելու մեջ, հետո Ենոքյանը արդարացվել ու ազատ է արձակվե: Ընդհանրապես Կարապետյանը վերջին տարիներին հաճախ է հայտնվել աղմկահարույց պատմությունների կիզակետում: Դեռ 2009թ.-ին Երասխ-Երևան ավտոճանապարհին նա իր ավտոմեքենայում վեճի էր բռնվել Դվին գյուղի բնակիչ Արթուր Զադոյանի հետ, որի ընթացքում Զադոյանը երկաթյա ձողով հարվածել էր Կարապետյանի գլխին, որն էլ իրեն ամրակցված ատրճանակով 5 անգամ կրակել էր Արթուր Զադոյանի ուղղությամբ: Փամփուշտներից երկուսը դիպել էին Զադոյանի աջ ուսին և աջ ոտքին: Կարո Կարապետյանը հայտարարել էր, թե Արթուր Զադոյանն է իրեն դարանակալել և ցանկացել հաշվեհարդար տեսնել` իրեն ունեցած 57 հազար դոլար պարտքը չտալու նպատակով: Գործի քննությունն ուշագրավ էր այն առումով, որ Կարո Կարապետյանն այդպես էլ այս գործով ո՛չ մեղադրյալ, ո՛չ տուժող չճանաչվեց: Իսկ ավելի ուշ կասեցրին գործի վարույթը: Մի խոսքով՝ ողջ կյանքը կարելի է ասել Կարապետյանը նման պատմությունների  մեջ է եղել, ինչն էլ այսպիսի ավարտ ունեցավ: Անի Սահակյան