Շտապ. դիմակավորված անձինք դանակահարել են Գյումրիի թիվ 3 բժշկական կենտրոնի տնօրենին

Այսօր՝ մարտի 25-ին, արտակարգ դեպք է տեղի ունեցել Շիրակի մարզում: Վաղ առավոտյան 2 դիմակավորված անձինք Գյումրի քաղաքում իր տան՝ Վազգեն Սարգսյան 1-ին նրբանցքի թիվ 4 հասցեից աշխատանքի մեկնելու ժամանակ դանակի մի քանի հարվածներ են հասցրել Գյումրիի թիվ 3 ընտանեկան բժշկական կենտրոնի տնօրեն Արտուշ Ասատրյանին: Ինչպես հայտնում է ֆոտոլրագրող Գագիկ Շամշյանը, այս պահին բժիշկը գտնվում է Գյումրիի հիվանդանոցի վիրահատարանում: Դեպքի վայր են ժամանել ոստիկանության Շիրակի մարզային վարչության օպերատիվ խումբը՝ մարզի ոստիկանապետ, ոստիկանության գնդապետ Սարգիս Մաթևոսյանի գլխավորությամբ: Փաստի առթիվ Հայաստանի քննչական կոմիտեի Շիրակի մարզային քննչական վարչությունում հարուցվել է քրեական գործ: Ֆոտոլրագրողի տեղեկություններով՝ Ա. Ասատրյանը ավտոմեքենան դուրս հանելիս է եղել, երբ նրան դանակահարել են: