Վարչապետը հակահեղափոխականներին իրա թիմում պետք է ման գա. Գագիկ Ծառուկյան

«Ժողովուրդը ուզում է դեկտեմբերին, ուրեմն մենք էլ ենք ուզում, մենք այդպիսի խնդիր չունենք: Հանդիպելու եմ  արտախորհրդարանական ուժերի հետ, նրանց, որոնք չեն համագործակցել Ռոբերտ Քոչարյանի եւ Սերժ Սարգսյանի հետ: Եթե անգամ նախկինում կառավարության մաս էին կազմում, իսկ հիմա՝ ոչ, իր համար դա ոչ մի բան չի փոխել»,- այս մասին «Կենտրոն» հեռուստաընկերության «Ուրվագիծ» հաղորդաշարի եթերում ասաց ԲՀԿ նախագահ, ՀՀ ԱԺ «Ծառուկյան» խմբակցության ղեկավար Գագիկ Ծառուկյանը: Հ արցին՝ նշանակում է հակահեղափոխությանը չի միացել, Գագիկ Ծառուկյանը պատասխանեց. «Հեղափոխության կողմնակիցն եմ եղել եւ այսօր ավելի շատ եմ անելու, պատասխանատվությունը ինձ վրա է, գալիս են 25 երկրներից 5 հազար ներդրողներ՝ ներդրումների համար»: Գագիկ Ծառուկյանը պարզաբանեց, որ ներդրողների հոսքը կանգնել է ոչ թե այն պատճառով, որ արտահերթ ընտրություններ չեն լինում, այլ բոլորովին այլ պատճառով. «5 մեքենա իրար հետեւից գնում ա, պառկացնում են ասֆալտին, ինչի համար: Պարոն վարչապետը այդ հակահեղափոխական մարդկանց իրա թիմում պետք է ման գա»: Նա նկատեց, որ վարչապետի ընտրվելու համար անհրաժեշտ ձայների մեկ երրորդը հատկացրել է, այնինչ կարող էր իր թեկնածությունը դնել. «Ասել եմ ժողովուրդ ջան, ձեր ուզածով է լինելու: Այսօր հեղափոխությունը առանց արյան չի լինում, «վլաստը» հենց այնպես չի տրվում, բայց Ծառուկյանը ոտի է հելել»: «Ոչ պաշտոն եմ ուզում, ոչ փող, ինչ վատ բան եմ արել իմ ժողովրդին»,-հավելեց ԲՀԿ նախագահը: Գագիկ Ծառուկյանը նկատեց, որ երբ Նիկոլ Փաշինյանին, Սասուն Միքայելյանին, Արարատ Միզոյանին ձերբակալել էին, առաջինը ինքը նրանց կողքին կանգնեց. «Այդ ժամանակ ոչ մեկը չէր պատկերացնում, որ հնարավոր է Սերժ Սարգսյանը հրաժարական տա, բայց ես կանգնել եմ կողքին եւ Սերժ Սարգսյանի հետ շատ սուր խոսակցություն եմ ունեցել: Անմիջապես զանգել է ինձ, ես ասել եմ՝ ընդդիմադիր եմ եւ իմ ընդդիմադիր գործընկերների հետ եմ»,-ասաց Գագիկ Ծառուկյանը: Նա ընդգծեց, որ միայնակ հեղափոխություն անել հնարավոր չէ: