Ես ինձ երբեք թույլ չեմ տվել եւ թույլ չեմ տա լինել միջնորդ

«Ժամանակ» թերթն այսօր գրել է. «Նախօրեին Ազգային ժողովում խնդրահարույց օրինագծի քվեարկությանը «Ծառուկյան» դաշինքի միանալու գործում մեծ դերակատարում է ունեցել խմբակցության պատգամավոր Իշխան Զաքարյանը, ով միակն էր այս խմբակցությունից, որ միացել էր Ռոբերտ Քոչարյանի խափանման միջոց կալանքը փոխելու գլխավոր դատախազությանն ուղղված միջնորդությանը։ «Ծառուկյան» դաշինքի և ընդհանրապես ԲՀԿ-ի շուրջ առաջիկա բոլոր զարգացումները համակարգելու է Իշխան Զաքարյանը։ Նա էլ դառնալու է Ռոբերտ Քոչարյանի և Գագիկ Ծառուկյանի հարաբերությունների կարգավորման գլխավոր դերակատարը։ Իշխան Զաքարյանի համար հակահեղափոխության հաղթանակը անձնական ունեցվածքի պահպանման և անվտանգության ապահովման միակ հնարավորությունն է»։ «Հրապարակը » այդ  առիթով կապվեց  ԱԺ պատգամավոր, Վերահսկիչ պալատի նախկին նախագահ Իշխան Զաքարյանի հետ եւ հետաքրքրվեց՝ իսկապե՞ս ինքը միջնորդական առաքելություն է ստանձնել Գագիկ Ծառուկյանի եւ Ռոբերտ Քոչարյանի միջեւ։ Նա պատասխանեց․ «Ինձ համար անհասկանալի է որոշ լրատվամիջոցներով իմ անվան շուրջ հերթական ստի տարածման իմաստը։ Ես բավականին հավասարակշռված եւ, կարծում եմ, լուրջ ճանապարհ անցած պետական գործիչ եմ։ Ես բոլոր քայլերն անում եմ բաց, հրապարակային եւ առանց ավելորդ էմոցիաների։ Ես ինձ երբեք թույլ չեմ տվել եւ հիմա առավել եւս թույլ չեմ տա հասուն եւ լուրջ ճանապարհ անցած մարդկանց միջեւ լինել միջնորդ»։