Շառլ Ազնավուրի՝ Փարիզում կայանալիք հրաժեշտի արարողության մանրամասները

Աշխարհահռչակ ֆրանսահայ շանսոնյե Շառլ Ազնավուրի հրաժեշտի արարողությունը տեղի կունենա Փարիզում հոկտեմբերի 5-ի առավոտյան: Ինչպես հայտնում է Rusarminfo-ն, վերջին հրաժեշտի արարողության մասին մանրամասներ է ներկայացրել Europe 1 ֆրանսիական ռադիոկայանը: Սպասվում է, որ արարողությանը ներկա կգտնվի Ֆրանսիայի նախագահ Էմանուել Մակրոնը և հանդես կգա ելույթով: Իսկ Ֆրանսիայի Ազգային Գվարդիայի նվագախումբը կկատարի լեգենդար շանսոնյեի հայտնի ստեղծագործությունները: Նշվում է նաև, որ արարողությանը ներկա կգտնվեն Ազնավուրի ընտանիքի անդամները, այդ թվում և քույրը՝ Աիդան: Հիշեցնենք, որ ավելի վաղ հաղորդվող լուրերի համաձայն՝ Ազնավուրի ընտանիքը դեմ էր հանդիսավոր արարողություների անցկացմանը և ցանկանում էր հուղարկավորությունն իրականացնել ընտանեկան շրջապատում: Ազնավուրին կհուղարկավորեն Մոնֆոր Լամորի համայնքում, որտեղ գտնվում է արտիստի տոհմական դամբարանը: Հայաստանում հուղարկավորության օրը սուգ կհայտարարվի: