«Ելք»-ի կողմնակիցների զգալի մասը «ԲՀԿ», «ՀՅԴ», «ՀՀԿ» էլեկտորատն է․ Ադիբեկյան

«Ելք»-ը գնում է ինքնամեկուսացման՝ դառնալով միայնակ քաղաքական դաշտում։ ArmDaily.am-ի հետ զրույցում այսպիսի կարծիք հայտնեց սոցիոլոգ Ահարոն Ադիբեկյանն։ ««ԲՀԿ»-ն ու «ՀՅԴ»-ն միացել էին «Ելք»-ին ոչ թե նրա համար, որ վերջինիս համախոհն են կամ քաղաքական գործընկերը, այլ նրանք դեմ էին «ՀՀԿ»-ին։ Երբ խոսքը գնաց իրենց շահերի մասին՝ հրաժարվեցին «Ելք»-ից»,- նշեց նա՝ ավելացնելով, որ «Ելք»-ն այժմ ինքնամեկուսացման վիճակում է։ «Ելք»-ի կողմնակիցների զգալի մասը «ԲՀԿ»-ի ու «ՀՅԴ»-ի էլեկտորատն է և հնարավոր է «ՀՀԿ»-ի էլեկտորատի մի մասը։ Ադիբեկյանի խոսքով՝ ընտրությունների հնարավորությունը դեռ հարցականի տակ է։ «Եթե Փաշինյանը պաշտոնից հրաժարվելու դիմում ներկայացնի, Ազգային ժողովը կարող է չընդունել և ասել՝ գնա ու կառավարի։ Եթե նա երկու անգամ կտրուկ հրաժարվի, ԱԺ-ն հնարավոր է նորից ասի՝ մենք ուզում էինք, որ դուք վարչապետ լինեիք, բայց մեզ ձեռք չի տալիս ընտրություններն անցկացնել դեկտեմբերին։ Եվ արդյունքում ժամանակավոր վարչապետ կնշանակեն մեկ ուրիշին»,- ասաց սոցիոլոգը։ Ադիբեկյանն անդրադառնալով ԱԺ խմբակցությունների պայմանավորվածությանը, որ թեկնածու չեն առաջադրի՝ ասաց, որ կարող է այդպես չլինի։ Եթե Փաշինյանը երկու անգամ հրաժարվի պաշտոնից, իրենք էլ չընդունեն դա՝ մինչ իրենց համար ընտրությունների բարենպաստ ժամանակահատվածը կնշանակեն պայմանական վարչապետի։ «Այս դեպքում «Ելք»-ն ու Փաշինյանը կհայտնվեն խաղից դուրս՝զրկվելով իշխանությունից։ Նրանց քաղաքական քաշը կարող է լուրջ անկում ապրել։ Մենք գիտենք, որ մարդկանց մեծ մասը նոր իշխանությունների հետ կապում են իրենց սոցիալական սպասելիքները։ Ղեկավարի վարկանիշն այս դեպքում բարձրանում է։ Օրինակ՝ Կարեն Կարապետյանի վարկանիշը 50 տոկոսն անց էր, քանի որ նա տարբեր խոստումներ էր տալիս։ Այն մարդն, ով ամբոխի համար համահունչ հարցեր է բարձրացնում, հրապուրում է խոստումներով՝ վարկանիշը կտրուկ բարձրանում է, և հակառակը՝ իշխանազրկվելու դեպքում վարկանիշը տասն անգամ իջնում է»,-ընդգծեց նա՝ ավելացնելով, որ դա տեսել ենք Լևոն Տեր-Պետրոսյանի, Ռոբերտ Քոչարյանի դեպքում։ Իսկ Սերժ Սարգսյանի վարկանիշը բարձր էր, երբ Կարեն Կարապետյանը պետք է վարաչապետ դառնար։ Սոցիոլոգի խոսքով՝ գոյություն ունեն գործընթացներ, որոնց մասին քաղաքագետները պատկերացում չունեն։ «Եթե լինեն ընտրություններ, հենվելով սեպտեմբերի 23-ին տեղի ունեցած Երևանի ավագանու ընտրությունների վրա, «Ելք»-ը կարող է հավաքել 43 տոկոս, հարց է առաջանում՝ մյուս 57 տոկոսն ում է հասնելու։ Եթե խաղի մեջ մտնեն ՀՀԿ-ն, ԲՀԿ-ն, ՀՅԴ-ն ու կոալիցիա կազմեն որպես ուժ, «Ելք»-ը նրանց դեմ չի կարող դուրս գալ։ «Ելք»-ը դեռ պետք է երկար մտածի՝ արտահերթ ընտրությունների գնալուց առաջ՝ իր դեմ բավականի հզոր քաղաքական ուժեր ունենալով»,- նշեց Ադիբեկյանը։ Նա ասաց՝ երբ հաշվարկում ենք ընտրողների թվաքանակը՝ Երևանի ավագանու ընտրություններին մասնակցել է երևանցիների մոտավորապես 1/3-ը։ Ընտրողների 35 տոկոսն աջակցել է Փաշինյանի թեկնածուին, մյուսները չեն մասնակցել։ Եթե տեղի ունենան ԱԺ ընտրություններ, կմասնակցեն մյուս 490 համայնքների ղեկավարները, որոնց ձայները վերահսկողության տակ են, քանի որ 510 համայնքներից 350-ում ՀՀԿ-ի կողմից նշանակված գյուղապետեր ու քաղաքապետեր են, որոնց միանգամից փոխելն անհնար է։ «Նրանք իրենց պաշտոնը պահպանելու համար պետք է աջակցեն Հանրապետական կուսակցությանը»,- ընդգծեց Ադիբեկյանն՝ ավելացնելով, որ խմորումները բավականի լուրջ են, դրա համար պետք է վստահ լինել, որ դեկտեմբերին կանցկացվեն արտահերթ ընտրություններ, ապա հարցումների միջոցով հասկանալ՝ էլեկտորատի նախապատվություններն ինչպես են փոխվել։