Խնդիրներ կառաջանան նման հայտարարություններ անողների համար. վարչապետը մանրամասնում է

Ես երեկ ԱԺ նախագահի աշխատասենյակում քաղաքական ուժերի հետ կայացած հանդիպման ժամանակ ասել եմ, որ դեկտեմբերին պետք է տեղի ունենան արտահերթ ընտրություններ, ասել եմ նաեւ մեխանիզմի մասին: ԱԺ-ում կառավարության հետ հարցուպատասխանի ժամանակ նշեց ՀՀ վարչապետ Նիկոլ Փաշինյանը՝ պատասխանելով Ալեն Սիմոնյանի հարցին, թե ի վերջո, ինչ որոշում կայացվեց: Վարչապետի խոսքով, ՀՀԿ, ՀՅԴ, «Ծառուկյան» խմբակցությունների ներկայացուցիչներն ասել են, որ վարչապետի պաշտոնը թափուր մնալու դեպքում իրենք չեն պատրաստվում թեկնածու առաջադրել: «Ես նաև ասել եմ մեխանիզմի մասին, և ՀՀԿ, «Ծառուկյան» դաշինք և ՀՅԴ խմբակցությունների ներկայացուցիչներն ասել են, որ վարչապետի պաշտոնը թափուր մնալու դեպքում իրենք չեն պատրաստվում թեկնածու առաջադրել: Սա եղել է այն համատեքստում, որ մեր գործընկերները հստակ արձանագրել են երկրում առկա քաղաքական իրավիճակը և կարծում եմ, որ խելամտությունը ստիպում է, որ երկրորդ մայիսի 1 անելու գայթակղությանը տրվելն ավելորդ կլինի»,- ընդգծեց նա: Վարչապետը հավելեց, որ մամուլում որոշակի հրապարակումներ կան, որոնց տրամաբանությունն առնվազն նույնական չէ իր նշած բովանդակության հետ: «Անկեղծ ասած՝ ես դա մեծ խնդիր չեմ համարում, համենայնդեպս, մեր կառավարության և քաղաքացիների համար: Խնդիրներ կառաջանան նման հայտարարություններ անողների համար, որովհետև 2018թ. մայիսի 1-ին ես այս ամբիոնից էլ արձանագրեցի որոշ ուժերի ինքնասպանություն գործելու փաստի մասին և կարող եմ ասել, որ ինքնասպանությունների շարքը շարունակվում է»,- եզրափակեց վարչապետը: Ավելի վաղ ՀՀԿ խմբակցությունից Արմեն Աշոտյանը, Էդուարդ Շարմազանովը, Վահրամ Բաղդասարյանը լրագրողների հետ զրույցում հայտարարել էին, որ այդ հանդիպման ժամանակ վարչապետի հրաժարականի դեպքում նոր թեկնածու չառաջադրելու վերաբերյալ պայմանավորվածություն ձեռք չի բերվել: