Որտե՞ղ են ուզում մեզ «քցել»
Россия-1 հեռուստաալիքը հրապարակել է նոր տեսանյութ, որի կադրերում են նաև Դուշանբեում զրուցող ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը: Ռեպորտաժի հեղինակը նկատել է, որ թեև երկու երկրների ղեկավարները լարված էին, բայց դա նրանց չի խանգարել զրույցը շարունակել դեպի նիստերի դահլիճ տանող ամբողջ ճանապարհին Ադրբեջանական մամուլը հրապարակված այս կադրերը որակել է սենսացիոն: Ադրբեջանական կայքերը Դուշանբեից Հայաստան վերադարձած վարչապետ Նիկոլ Փաշինյանի՝ ֆեյսբուքյան իր ուղիղ եթերում հաղորդած տեղեկություններն են անգամ հրապարակել, որում նա պատմում էր Ալիևի հետ կայացած հանդիպման ժամանակ ունեցած զրույցի մասին ու ձեռք բերված պայմանավորվածությունների մասին: Դատելով ադրբեջանական լրահոսի հրապարակումներից, Բաքվում հրահանգ է իջեցվել խիստ կարևորել Փաշինյան-Ալիև՝ Դուշանբեի բանավոր պայմանավորվածությունները: Ադրբեջանից պատգամավորներ, ոչ բարձրաստիճան պաշտոնյաներ այս օրերին զբաղված են Փաշինյան-Ալիև հանդիպումը շարունակաբար կարևորելով: Հանդես է եկել նաև ԵԱՀԿ Մինսկի խմբում ամերիկացի նախկին համանախագահը: Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի միջև վերջերս տեղի ունեցած զրույցը կարևոր նշանակություն ունի ղարաբաղյան բանակցային գործընթացի ակտիվացման համար, ադրբեջանական Trend գործակալության հետ զրույցում ասել է Ադրբեջանում ԱՄՆ նախկին դեսպան, ԵԱՀԿ Մինսկի Խմբի նախկին համանախագահ Մեթյու Բրայզան: «Նրանց կողմից բանակցային գործընթացին հավատարմության համատեղ հավաստիացումները, ինչպես նաև հրադադարի ռեժիմի ամրապնդման մասին համաձայնությունը՝ հանուն շփման գծում և հայ-ադրբեջանական սահմանին միջադեպերի կանխման, ողջամիտ քայլեր են, որոնք արդեն վաղուց բարձրաձայնվում են ԵԱՀԿ Մինսկի խմբի կողմից»,- ասել է Բրայզան: Նա հավելել է, որ այդպիսի դրական անձնական շփումներն անհրաժեշտ են բանակցային գործընթացի ամրապնդման համար և առանցքային գործոն են փոխադարձ վստահության որոշակի աստիճան ապահովելու համար, ինչն էլ իր հերթին բանակցային գործընթացում ցանկացած բեկման նախադրյալ կարող է լինել: Նկատելի է, որ Բաքուն փորձ է անում առավել քան կարևորել Դուշանբեի մի քանի րոպեանոց Փաշինյան-Ալիև հանդիպումը: Միաժամանակ, երեկ հայտնի դարձավ, որ Արցախի ՊԲ-ում զինվոր է զոհվել՝ դեռևս չպարզված հանգամանքներում: Բաքուն թակարդ է լարում, թե՞ իսկապես ցանկանում է կայունություն հաստատել սահմաններում՝ ավելի հստակ կլինի քիչ անց: Մետաքսյա Շալունց
Հետևեք մեզ Viber-ում
