Ծռերը շարքային հաճախորդ, թե վտանգավոր ական
Հայաստանում ծնունդ առավ եւս մեկ կուսակցություն՝ «Սասնա ծռերը» հիմնադիր համագումարում հայտարարեցին կուսակցություն դառնալու մասին։ Խոսքը Ժիրայր Սեֆիլյանի թիմի մասին է, որը երկու տարի առաջ զինված ապստամբությամբ գրավեց ՊՊԾ գունդը եւ այն, ինչ տեղի ունեցավ, գիտենք բոլորս, ինչպես որ գիտենք՝ չլիներ թավշյա հեղափոխությունը, Աստված գիտե, թե ինչ կլիներ Սասնա ծռերի տղաների հետ, որոնք, սակայն, այսօր ազատության մեջ են ու քաղաքականությամբ զբաղվելու հայտ են ներկայացնում: Ինչով է տարբերվելու այս կուսակցությունը Հայաստանում գործող 70-ից ավել կուսակցություններից, ինչ նոր խոսք է բերելու քաղաքականություն, ինչով է մրցակցելու դաշտում գոյություն ունեցող մեծ խաղացողների հետ, առայժմ անհայտ է: Ընդհանրապես Սասնա ծռերի կուսակցություն դառնալն ինքնին անհասկանալի է նոր Հայաստանում: Զինված ապստամբությունից երկու տարի չանցած Հայաստանում տեղի ունեցավ ոչ բռնի, թավշյա հեղափոխություն, բաց ձեռքերի հեղափոխություն՝ ի հեճուկս Ծռերի ու նրանց համակիրների, որոնք համարում էին, որ չկա առանց զենքի փրկություն: Եւ ահա, այդ ամենից հետո Հայաստանում ձեւավորվում է մի կուսակցություն, որի գաղափարական հետեւորդները շարունակում են պնդել ապստամբության իրավունքի իրացման արդարացիությունը եւ ասում, որ կօգտվեն այդ իրանունքից ցանկացած պահի, երբ դրա անհրաժեշտությունը զգան, երբ դրա հիմքերը իշխանությունները ստեղծեն: Իհարկ, այսօր նրանք ողջ կազմով աջակցում են Նիկոլ Փաշինյանին եւ անվերապահ ընդունում նրա ցանկացած քայլը, սակայն պատից կախված հրացանը, որ մի օր կրակելու է, դրանում թող ոչ ոք չկասկածի: Մյուս կողմից՝ Սասնա ծռերի քաղաքական նկրտումների համար պարարտ հող ստեղծեց Նիկոլ Փաշինյանը, անկախ ամեն ինչից տեղի էր ունեցել զինված ապստամբություն, որի ընթացքում մարդկային կորուստներ եղան եւ Ծռերի ազատության համար պատասխանատվությունը նախեւառաջ Նիկոլ Փաշինյանինն է, քանզի դատարանները ինքնուրույն չէին գնա նման որոշման… Եւ ուրեմն, Փաշինյանի ինչին է պետք այս կուսակցությունը, եթե այն ինչ-որ պահի կարող է ռումբ դառնալ իր իշխանության տակ: Գաղտնիք չէ Արցախի հարցում Ժիրայր Սեֆիլյանի եւ իր թիմի արմատական դիրքորոշումը: Ըստ ամենայնի՝ Փաշինյանն էլ Սերժ Սարգսյանի փորձված մեթոդներով քաղաքական դաշտը վերաձեւում է իր ճաշակին համապատասխան եւ Ծռերին որպես վստահելի հաճախորդ պահելու է Ռուսաստանի դեմ մանեւրելու նպատակով: Հիշենք, որ երկու տարի առաջ ապստամբությունը տեղի ունեցավ այն բանից հետո, երբ շրջանառության մեջ դրվեց Ռուսաստանի ջանքերով ազատագրված տարածքների վերադարձի թեման: Անի Սահակյան
Հետևեք մեզ Viber-ում
