«Ինչո՞ւ ՔՊ-ն չի սատարում Սևակ Միքայելյանին»

Լրագրող Կարինե Հարությունյանը ֆեյսբուքյան իր էջում գրել է. «Անգամ ժողովրդավարությունը մեզանում կարող է սխալ ընկալվել: Անգամ ժողովրդավարության մեջ կարող են, այսպես ասած, կեղտ փնտրել: Սևակ Միքայելյանը՝ Սասուն Միքայելյանի որդին, ինքնառաջադրվել է Հրազդանում՝ որպես քաղաքապետի թեկնածու: Նրա հետ ինքնառաջադրվել է ևս չորս թեկնածու: Այսպիսով՝ Հրազդանի քաղաքապետի պաշտոնի համար պայքարելու է հինգ հոգի: ՔՊ-ն հայտարարել է, որ չի պաշտպանելու Սևակի թեկնածությունը: Ո՞րն է այստեղ խնդիրը: Արի ու տես, որ ոմանց կարծիքով կա խնդիր. ինչու՞ ՔՊ-ն չի սատարում Սևակ Միքայելյանին, որը նաև Հրազդանի ՔՊ կառույցի ղեկավարն է: Եթե ՔՊ-ն սատարեր Սևակին, ասելու էին՝ հա, դե, Սասունի տղան է, սատարում են՝ ՀՀԿ-ի ոճով, բան չի փոխվել և այլն: Հիմա չի սատարում, ասում են՝ ինչու՞ չի սատարում, ինչու՞ է Սևակն ինքնառաջադրվել, կարող էր չմասնակցել և այլն: Հարգելիներս, ՀՀ քաղաքացին, ըստ ձեզ, իրավունք ունի՞ մասնակցելու երկրում տեղի ունեցող քաղաքական իրադարձություններին, թե՞ ոչ: Եթե այոʹ, ուրեմն ո՞րն է խնդիրը: Եթե ոչ, ապա ինչու՞ ընդդիմադիր գործունեության դեպքում այդ իրավունքը գործում է, իսկ քաղաքապետի ընտրություններին մասնակցելու պարագայում՝ ոչ: Չե՞ք զգում, որ խտրականություն է առաջանում: Երկրորդ` ՔՊ-ն ինչու՞ չի սատարում Սևակ Միքայելյանին: Շատ պարզ է. ՔՊ-ն ժողովրդավարության ջատագով քաղաքական ուժ է և եթե սատարեր իր անդամին, պիտի թեկնածուների միջև հավասարությունը խախտվեր՝ պայմանավորված նրա հոր՝ Սասուն Միքայելյանի անձով: Այդ ժամանակ իսկապես կլիներ ՀՀԿ-ի ոճով՝ սատարում է իր կուսակցության հայտնի դեմքերից մեկի որդուն: Հիմա լա՞վ չէ, որ կուսակցությունը Սևակին թողել է մենակ՝ մյուսների հետ պայքարում և սրանով ապահովում է ազատ մրցակցություն: Տարբերություն կա՞, թե՞ ոչ»: