ԴԱԻՇ ահաբեկչական խմբավորման դեմ պայքարում կիրառել «խելացի» մոտեցումներ
ԱՄՆ-ը մտադիր է ԴԱԻՇ ահաբեկչական խմբավորման դեմ պայքարում կիրառել «խելացի» մոտեցումներ, ոչ թե ինտենսիվ ռմբակոծություններ և Մերձավոր Արևելքում այդպիսի գործողությունների մարտավարություն։ Այս մասին մամլո ասուլիսում ասել է ԱՄՆ նախագահ Բարաք Օբաման Արգենտինա այցի ընթացքում՝ փոխանցում է TASS գործակալությունը։ Հարցին՝ բրյուսելյան ահաբեկչությունները կփոխե՞ն ԱՄՆ-ի գործողությունները ԴԱԻՇ-ի դեմ ուղղված արշավում, Օբաման պատասխանել է՝ ասելով, որ ԴԱԻՇ-ին հակազդելու համար պետք է կիրառել այնպիսի մոտեցում, որոնք ապացուցել են իրենց արդյունավետությունը։ Նա նշել է, որ դրանք հարվածներն են օդից, հատուկ նշանակության ջոկատների նպատակային գործողությունները, որոնք անցկացվում են Իրաքում տեղի ուժերի հետ համատեղ։ Նախագահը քննադատել է Հանրապետական կուսակցության ներկայացուցիչներին, ովքեր պահանջում են կտրուկ ակտիվացնել ռազմական գործողությունները։ Խոսքը, մասնավորապես, Տեխաս նահանգից սենատոր Թեդ Քրուզի մասին է, ով հավակնում է ԱՄՆ նախագահի պաշտոնին։ ԴԱԻՇ-ի կողմից վերահսկվող տարածքները ինտենսիվ ռմբակոծության ենթարկելու Քրուզի՝ վերջերս արած առաջարկը Օբաման անվանել է անմարդկային և նշել, որ դա ծայրահեղականության դեմ պայքարի խելացի ռազմավարություն չէ։ Օբաման վստահեցրել է, որ ԴԱԻՇ-ի ջախջախումն իր համար թիվ մեկ առաջնահերթություն է։ «Իմ օրակարգում դրանից առավել կարևոր հարց չկա»,- խոստովանել է նախագահը։
Հետևեք մեզ Viber-ում
