Կուստուրիցայի նոր սցենարը՝ ՀՅԴ-ի մասին

Հրապարակը գրում է.Տեսակետ կա, որ համաձայնության կառավարության անդամ ուժերի լիդերները՝ Հրանտ Մարգարյանն ու Գագիկ Ծառուկյանը, չեն կարողանում հանդիպել վարչապետ Փաշինյանի հետ, սակայն օրերս լուր սպրդեց, որ ընկեր Հրանտը հաջողացրել է հանդիպել նրա հետ։ Եղե՞լ է նման հանդիպում՝ հարցրինք ԱԺ ՀՅԴ ֆրակցիայի ղեկավար Արմեն Ռուստամյանին։ «Տեղյակ չեմ, կարծում եմ՝ նման հանդիպում տեղի չի ունեցել»։ Չար լեզուների տեղեկացմամբ՝ ընկեր Հրանտը դժգոհություն է հայտնել, որ Փաշինյանը պաշտոնական ընդունելության է արժանացնում ՀՅԴ ամերիկյան թեւին, որը դեմ է ընկեր Հրանտին, երեկ համացանցում արդեն լուսանկար կար՝ Փաշինյան-Վիգեն Հովսեփյան հանդիպման մասին վկայող, եւ տակը գրված․ «ՀՅԴ ապագա առաջնորդը»։ Փաշինյանի թիմում էլ հակադարձում են, թե ընկեր Հրանտն է հանդիպումներ ունենում Քոչարյանի հետ։ «Առաջնորդվեք ձեր տեղեկություններով, ես այդպիսիք չգիտեմ»,- ասաց Ռուստամյանը։ Փաշինյանականներն ասում են՝ դուք համաձայնության կառավարության անդամ եք, բայց հանդիպում եք «հակահեղափոխական սեւերի» առաջնորդ Քոչարյանի հետ, ընկեր Հրանտն էլ ասել է՝ պարոն Փաշինյանն ասել է, որ չկա համաձայնության կառավարություն, մենք ազատ ենք եւ կարող ենք ում հետ ցանկանանք, հանդիպենք։ Պարոն Ռուստամյան, հիմա դուք սատարում եք Ռոբերտ Քոչարյանի՞ն, թե՞ Նիկոլ Փաշինյանին։ «Մեր կուսակցությունը գաղափարակիր անդամներ ունի, որոնցից մեկն էլ ես եմ՝ համեստս, եւ որեւէ բանի, քան իմ գաղափարներին, երբեք չեմ ծառայել»։ Ես չեմ հարցնում, թե դուք ում եք ծառայում, այլ՝ ում եք սատարում։ «Սատարումը կարող է վերածվել ծառայության, մենք ոչ մի կապ չունենք Ռոբերտ Քոչարյանի հետ»։ Փաշինյանի հետ չունեք, Քոչարյանի հետ չունեք, ո՞ւմ հետ ունեք։ «Ասացի՝ մեր գաղափարների»։ Ո՞ր դեպքում դուրս կգաք համաձայնության կառավարությունից․ ի դեպ, չար լեզուներն ասում են, որ Հրանտ Մարգարյանը Փաշինյանին ասել է՝ դուրս կգանք համաձայնության կառավարությունից, երբ ինքներս կցանկանանք։ «Էդ ինչ-որ մեկը սցենա՞ր է գրել, կինո՞ է նկարահանել էդ մասին, չհասկացա»։ Այո՝ Կուստուրիցան․ Դուք է՞լ եք նրա սիրահարը։ «Չէ, ես սիրում եմ միայն Աստծուն, ինչպես Աստված է սիրում մեզ»։