Արտակարգ դեպք Արագածոտնի մարզում․ֆինանսական տնօրենը ֆուտբոլիսին սպառնացել է սեռական բնույթի գործողություններ կատարել իր նկատմամբ
SHAMSHYAN.com-ի տեղեկություններով՝ սեպտեմբերի 19-ին «Գանձասար-Կապան» ակումբի ֆինանսական տնօրեն Գ․ Ա․-ն իր մոտ է հրավիրել Ա․ Ս․-ին և, ըստ Ոստիկանության ստացած օպերատիվ տվյալների՝ նա հոգեբանական ճնշում է գործադրել Ա․ Ս․-ի նկատմամբ, հայհոյել և սպառնացել սեռական բնույթի գործողություններ կատարել։ Գ․ Շամշյանի տեղեկություններով՝ պարզվել է, որ Ա․ Ս․-ն Բելառուսի Հանրապետության քաղաքացի է, 27 տարեկան, ով «Գանձասար-Կապան» ֆուտբոլային ակումբի խաղացող է։ Վերջինը ոստիկաններին հայտնել է, որ դեպքը տեղի է ունեցել Աշտարակ քաղաքի մարզադաշտում։ Եվ իր ու Գ․ Ա․-ի միջև պայմանագրի խզման հարցի շուրջ վիճաբանություն է տեղի ունեցել, որի ժամանակ Գ․ Ա․-ն սպառնացել է կոտրել իր քիթը և սեռական բնույթի գործողություններ կատարել իր նկատմամբ։ Նա անգամ ցանկացել է հարվածել իրեն։ Փաստի առթիվ Ոստիկանության Աշտարակի բաժնի հետաքննչական բաժանմունքում նյութեր են նախապատրաստվում։ Ոստիկանությունը պարզում է հաղորդման իսկությունը։ SHAMSHYAN.com-ի տեղեկություններով, խոսքը գնում է «Գանձասար-Կապան» ակումբի ֆինանսական տնօրեն Գառնիկ Աղաբաբյանի և թիմի բելառուս պաշտպան Ալեքսանդր Սվերչինսկիի միջև ծագած կոնֆլիկտի մասին: Ուշագրավ է, որ երեկ՝ սեպտեմբերի 23-ին, «Գանձասար-Կապանը» պաշտոնական հաղորդագրություն է տարածել, որ Ալեքսանդր Սվերչինսկիին թիմից հեռացնելու որոշում է կայացրել՝ կարգապահական կոպիտ խախտումներ թույլ տալու պատճառով։ Բոլոր դեպքերում, սա արտառոց միջադեպ է և չի կարող զուտ «Գանձասար-Կապանի» ներքին գործ համարվել: Այն լուրջ ստվեր է գցում հայկական ֆուտբոլի հեղինակության վրա, կարող է ֆուտբոլի և մարզական միջազգային արբիտրաժային կազմակերպությունների ուշադրության կենտրոնում հայտնվել, և մեր համար տհաճ հետևանքներ ունենալ: Հետևաբար, այս միջադեպը պետք է շտապ քննարկման առարկա դառնա Հայաստանի ֆուտբոլի ֆեդերացիայի նորանշանակ գործկոմի կողմից: Ցանկալի է, որպեսզի ՀՖՖ նախագահ Արթուր Վանեցյանը արագ արձագանքի տեղի ունեցածին: Լուսանկարը՝ «Գանձասար-Կապանի» պաշտոնական ՖԲ էջից: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Հետևեք մեզ Viber-ում
