Բաներ կա իմ վրա է գրանցված, բաներ կա՝ կնոջս. Քանի՞ մեքենա ունի Հայկ Մարությանը

«Իմ քայլը» դաշինքը այսօր հանդիպում էր Աջափնյակի բնակիչների հետ։ Իր թիմակիցների հետ Մարությանը պտտվում էր Աջափնյակի բակերով, ողջունում բնակիչներին և հրավիրում այսօր կայանալիք հանրահավաքին։ ԲՀԿ քաղաքապետի թեկնածու Նաիրա Զոհրաբյանը, դիմելով Հայկ Մարությանին, հայտարարել էր՝ «տղամարդ ես, արի հետս բանավեճի, բայց առանց Նիկոլի»։ Իսկ Մարությանի պատասխանը, թե չի պատրաստվում ոչ մի բանավեճի մասնակցել, եթե բոլոր 12 ուժերն էլ ներկա չլինեն, շատ քննարկվեց, կարծիք կար, որ «Իմ քայլի» թեկնածուն ուղղակի վախենում է միայնակ գնալ բանավեճի։ Armdaily.am-ն այսօր Հայկ Մարությանից հետաքրքրվեց, թե մտքափոխ չի՞ եղել բուռն արձագանքից հետո․ «Ես երեկ արդեն մի 4-5 լրատվամիջոցի պատասխանել եմ։ Իմ դիրքորոշման մեջ ոչինչ չի փոխվել»։ Իսկ թե ինչ քայլեր են ձեռնարկում ընտրակաշառքների բաժանումը կանխելու համար, դերասանը նշեց, որ իրենք նույնպես ունեն այդպիսի տեղեկություններ․ «Բայց մենք հիմնվում են միայն փաստերի վրա, դրա համար գործողություններ պետք է անեն իրավապահ մարմիններ։ Չեմ կարծում, որ ճիշտ կլինի իմ մեկնաբանությունը»։ Հայկ Մարությանը մերօրյա ամենասիրված և պահանջված դերասաններից է, իսկ քաղաքական ասպարեզ մտնելը արդյոք չի՞ խանգարի իր դերասանական կարիերային, նա պատասխանեց․ «Օրենքը ինձ թույլ է տալիս, որ ես զբաղվեմ դրանով, բայց ես վստահ եմ,որ ժամանակս չի հերիքի»։ Ի դեպ, օրեր առաջ քաղաքապետի թեկնածուները ներկայացրել էին իրենց ունեցվածքը, որտեղից պարզ դարձավ, որ Մարությանը ունի բնակարաններ Հայաստանում և Չեխիայում։ Մեզ տեղեկություններ էին հասել, որ Մարությանը նաեւ բազմաթիվ մեքենաներ ունի՝ մեկը մեկից թանկարժեք, թեեւ ընդամենը մեկ մեքենա է ներկայացրել։ ․«Դա իմ հայտարարագիրն է, բայց այնուհետև լինելու է կնոջս հայտարարագիրը։ Բնականաբար մենք մարդ ու կին ենք, և բաներ կա իմ վրա է գրանցված, բաներ կա՝ կնոջս։ Էնպես որ ամեն ինչ դեռ կտեսնեք»։