Քրեական հեղինակություն Զապի քրոջ որդին այսօր գրավի դիմաց ազատ է արձակվել. ՀԺ

armtimes.com-ի տեղեկություններով՝ քրեական հեղինակություն, «Զապ» մականունով հայտնի Անդրանիկ Սողոյանի քրոջ որդին՝ Արտյոմ Ղազարյանն, այսօր ազատ է արձակվել: Սպանության փորձի եւ ապօրինի զենք-զինամթերքի համար մեղադրվող քրեական հեղինակություն Արտյոմ Ղազարյանն այսօր դատավոր Վարդան Գրիգորյանի որոշմամբ ազատ է արձակվել 20 միլիոն դրամ գրավի դիմաց: Նա մեկ ու կես տարի է` գտնվում էր կալանքի տակ: Հիշեցնենք, որ 2017 թվականին Գյումրիում կրակոցներ էին հնչել. հունիսի 25-ին՝ ժամը 23:15-ին, «Գյումրի» բժշկական կենտրոնից ոստիկանության Կումայրիի բաժին ահազանգ էր ստացվել, որ բուժօգնության է տեղափոխվել որովայնի հրազենային վնասվածքով մի տղամարդ: Քրեական հետախույզները պարզել էին, որ Գյումրու Սայաթ-Նովայի փողոցում գործող սրճարաններից մեկի դիմաց տեղի է ունեցել փոխհրաձգություն, որին մասնակցել են Արտյոմ Ղազարյանը, 1986 թ. ծնված Կարեն Սարգսյանը եւ տուժողը՝ 30-ամյա Գեորգի Հակոբյանը: Ոստիկանության քրեական հետախուզության եւ ԿՀԴՊ գլխավոր վարչությունների, Շիրակի մարզային վարչության ու Կումայրիի բաժնի ծառայողների հետախուզական միջոցառումներով պարզվել էր, որ հրազենային վնասվածքը նրան պատճառել է Արտյոմ Ղազարյանը: Վերջինիս հայտնաբերել էին դեպքից մեկ ամիս հետո: