Ռեստորան չեմ գնում,գյուղում ռեստորան չկա.Արամ Սարգսյան

«Չեմ  կարող  հստակ ասել, թե հատկապես ում նկատի ուներ վարչապետ Նիկոլ Փաշինյանը, երբ երեկ հայտարարեց, որ որոշ ուժեր ընտրություններից առաջ «քուչեքում» ու ռեստորաններում բանակցում են ՀՀԿ-ի հետ, հակահեղափոխություն են անում։ Ես  շատ ընկերներ ունեմ  և ՀՀԿ-ից, և ԲՀԿ-ից, և տարբեր ուժերից, նրանց հետ հաճախ հանդիպում եմ, բայց ռեստորան գնալ չեմ սիրում, ոչ թե այն բանի համար, որ ռեստորանի ուտելիքը չեմ սիրում, այլ պարզապես գյուղում ռեստորան չկա»,-ԱԺ-ում ասաց Ազգային ժողովի «Ելք» խմբակցության պատգամավոր Արամ Սարգսյանը : «Աշխատանքից հետո  գնում եմ  գյուղ, հանում է կոստյումն ու փողկապը և հանգստանում։Իրեն հարցրեք, ինքը կասի՝ ում նկատի ունի: Ես որևէ բան չեմ բացառում: Եթե երկրի վարչապետն ինչ-որ բան ասում է, ուրեմն ինչ-որ բան գիտի: Կասի ինձ, ես կպատասխանեմ, կասի ուրիշին, ուրիշը կպատասխանի: Խնդիրը բացարձակ այդ հարթության մեջ չեմ նայում, ես նայում եմ, որ երկրի առաջ ծառացած խնդիրները պետք է լուծել քաղաքական դաշտում համախմբվածության, փոխադարձ հարգանքի մթնոլորտում», - հավելեց Արամ Սարգսյանը: Պատգամավորի խոսքով, ինքը հայ մարդուն չի բաժանում հեղափոխականի և հակահեղափոխականի, բաժանում է գաղափարակցի և ոչ գաղափարակցի: «Քննարկել կարելի է ամեն ինչ, ում հետ ցանկանաս: Ես երկրորդ կուրսում սովորող իմ աղջկա հետ էլ եմ քաղաքական հարցեր քննարկում։ Դժոխքի բաժին դառնալուն հավասար չէ քննարկումը», - հավելեց Արամ Սարգսյանը։