ԲՈԿ նախագահ. «Եթե օրենքն ամբողջ խստությամբ կիրառենք խորհուրդների վրա, ապա 60-ից 1-2-ը կմնա». aravot.am
«Այս ամիսներին փորձել եմ ուսումնասիրել մասնագիտական խորհուրդներում տիրող վիճակը, բարձրացված բոլոր խնդիրներն այն մասին, որ կան կոռուպցիոն սխեմաներ, գործընթացներ, երբ որակը չի վերահսկվում, տիրում են կամայական պրոցեսներ: Ցավոք, եկել եմ այն եզրակացության, որ այդ հարցերի մեծ մասն իրականություն է: Այժմ ԲՈԿ-ում կա 60 մասնագիտական խորհուրդ, որոնց ճնշող մեծամասնությունը ձեւավորվել է կարգի խախտումով, մինչդեռ գոյություն ունի կառավարության կողմից հաստատված կանոնակարգ, թե ինչպես պետք է ԲՈԿ-ի գործընթացները տեղի ունենան, եւ նրա դրույթների մեջ սահմանված չափանիշները, որոնց պետք է բավարարեն գիտնականները, որպեսզի ընտրվեն մասնագիտական խորհուրդներում»,- սեպտեմբերի 10-ին ՀՀ կրթության և գիտության նախարարությունում տեղի ունեցած ասուլիսում հայտնեց ԿԳՆ բարձրագույն որակավորման կոմիտեի (ԲՈԿ) նախագահ Սմբատ Գոգյանը: Նա ասաց, որ վերը նշված պատճառներից ելնելով` ինքը սեպտեմբերի սկզբին ստիպված է եղել դադարեցնել մասնագիտական խորհուրդներում ատենախոսությունների պաշտպանության ընդունելու գործընթացը` մինչեւ հստակ պատկեր ունենալը, թե որ մասնագիտական խորհուրդն ինչ չափով չի համապատասխանում իրականությանը: «Վիճակն այնպիսին է, որ եթե մենք օրենքն ամբողջ խստությամբ կիրառենք խորհուրդների վրա, ապա միգուցե մեկ կամ երկու մասնագիտական խորհուրդ մնա, որը կբերի գիտական աստիճանաշնորհման համակարգի կոլապսի: Դրա համար ստիպված եղանք մեղմացուցիչ լուծում գտնել: Եվս երկու շաբաթ կհետաձգվի ատենախոսությունների պաշտպանության ընդունելու կարանտինը, որի ընթացքում ավելի մանրակրկիտ հետազոտության արդյունքում կորոշենք, թե որ խորհուրդներն են բուժման ենթակա եւ որոնք` ոչ ու գլոբալ փոփոխության ենթակա»,-ընդգծեց ԲՈԿ նախագահը: ԲՈԿ նախագահը հավելեց, որ բազմաթիվ աղմկահարույց դեպքերը, որոնց մասին լսել ենք նախկինում, հենց նման բաների արդյունքում են տեղի ունեցել. «Երբ մասնագիտական խորհրդում ընդգրկում ես մի մարդու, որն իրավունք չուներ, բայց նրա կողքին կան եւս 2-3 արժանիներ, որոնք նույնպես չեն համապատասխանում չափանիշներին, սակայն նրանց չես ընդգրկում, ու այստեղ հարց է առաջանում, թե ինչու այդպես տեղի ունեցավ»: Գոգյանի ձեւակերպմամբ, տվյալ պարագայում կամայականության պահ կա, երբ ասում են, դու չես բավարարում չափանիշներին, քեզ չենք ընդունում, բայց մյուսը չի բավարարում` ընդգրկում են խորհրդի կազմում, այն դարձնելով ավելի կառավարելի: Մանրամասները՝ aravot.am-ում